Spiel, spiel ta ken ta mas bunita den pais?

Un mucha chikí mes ta sak’e sòm, ku Minister di Finansas, ke adorá su mes komo salbadó di pais. Maske si e mester saka mentira pa hasi esei.

Na promé luga proyektonan di wellness, esta di prevenshon amplio, a keda ehekutá ku eksito! Meta di prevenshon ámplio ta entre otro, pa stimulá hende pa biba salú dor di siña e hende komé salú pa evitá malesa, manera nos a hasi ku e proyekto ‘Kunukito” na diferente skol, kas di kuido i den barionan na Kòrsou. E proyekto a siña hende kiko kome, kon kushiná salú i kua bèrduranan e por planta pa baha su gastu di kuminda. E òrganisashon di salú PAHO a haña e proyekto asina bon, ku e la pidí pa dokument’e. Mayoria di e proyektonan aki ta den funshon.

Ademas a desaroyá un wil di kuminda lokal, ku te awe e ministerio di GMN ta usá pa informá públiko riba prevenshon di malesanan manera obesidat, diabetis i preshon haltu. Tambe a ehekutá proyektonan pa stimulá hende pa kana i guia mamanan ku resien a duna lus i tabatin programanan di konsientisashon na radio i televishon. A kuminsá ku desaroyo di un sistema di informashon di salú

. Entre 2018 i 2020 e proyektonan aki a kosta un total di 2 mion. No lubidá ku den mes periodo país ta paga 1.2 bión na kuido basá riba malesa i no tabata hasi nada na prevenshon.

Minister Silvania ta ‘lubidá’ di informá den su ataké riba sra. Römer, ku sra. Römer a baha mei mei di 2020 durante di e pandemia mundial di covid, i ku tabtatin 2 minister den funshon despues di dje, esta sra. Zita Jesús- Leitu (PAR) pa un aña i sra. Dorothy Janga (MFK) di su partido pa dos aña ku por a ehekutá e proyekto di Totolika. Kiko a sosodé den e añanan ei? Su partido ta sintá for di yuli 2021 riba e stul di GMN.

Di forma engañoso e ta hasi komo sifuera fondonan di e presupuesto di GMN a keda usá pa e proyekto di Wellness. E sa bon bon ku e fondonan pa Wellness ta SVB ku konformé Lei di Seguro Basiko a pone fondo disponibel pa prevenshon. Kemen e proyektonan di prevenshon, esta wellness, no tin nada di haber ku Totolika. Esmas, e proyeto di Totolika ku a kuminsá na 2015 bou minister

Whiteman. Römer a sigui kana ku ne i a pon’e riba presupuesto despues di aprobashon di Konseho di Minister. Basa riba un konseho di Departamento di Finansas, Römer a hasi e fundashon un kantidat di pregunta ku nan a kontesta ekstensamente. Debí na e pandemia di Covid masha hopi proyekto a para ketu i Römer a baha mei mei di 2020 i mei mei di pandemia i a laga debidamente informashon riba tur proyekto atrás. Kiko a sosodé despues?

Nos ta bolbé puntra: a siguí minister Leito (1 aña) i Minister Janga (2 aña). Kiko a sosodé tur e tempu ei? Entretantu minister Silvania ta partisipá den yen stunt polítiko. Mientrastantu miones ta keda gasta na kuido di malesa -600 mion pa aña- pero nada ta keda hasí pa prevení malesa i sufrimentu di nos pueblo…sero prevenshon, nada, niets!

Minister Silvania, no ta den fabula, ‘sprookje’, so kos ta kaba malu ku banidosonan ‘ijdeltuiten’, tin un dicho bieu ku ta bisa: ‘maske kon lihé mentira ta, bèrdat ta kue na kaminda’!