Partidonan MAN/PIN ta sumamente kontentu ku frakshon di MAN den parlamento di Kòrsou a pidi reunion di komishon sentral pa trata e preokupashonnan ku ta biba na nos universidat di Kòrsou UoC.
Di un forma kronológiko e rèktòr di UoC, sr. dr. F. de Lanoy, a deskribí e situashon di nos universidat, kaminda ela elaborá riba tur e fakultatnan, basa riba kua ta prepará hopi di nos profeshonalnan lokal.
E reto grandi den tur e situashon aki, ta e echo ku falta di fondo ta hunga un ròl negativo pa desaroyo di nos universidat. P’esei nos frakshon den parlamento a bin ta pidi pa pone e fondonan nesesario pa garantisá implementashon di trayektonan di mehorashon di strukturanan den nos universidat.
UoC tin diferente aliansa ku organisashonnan den sektor priva, manera APC, MCB, CTB. Ademas nos sektor públiko tambe ta haña kaminda na nos universidat. E ròl di UoC pa desaroyo i emansipashon di nos komunidat ta indispensabel.
Nos di MAN/PIN ta sostené nos frakshon den parlamento pa sigui hasi esfuerso pa logra haña parlamento asina leu, pa por pone e ANG 2.3 mion ku UoC tin derechi riba dje. E 2.3 mion aki ta debe ku tin na UoC despues di desmantelashon di Antias. Den e presupuesto di aña 2024 ku lo trata den reunion públiko den desèmber 2023, ta importante pa garantisá e fondonan aki pa UoC.
Pa MAN/PIN ta imperativo pa mantené e universidat nashonal su eksistensia den e lei di enseñansa superior ku ta den preparashon. Mester evitá komersialisashon di enseñansa superior na Kòrsou! Edukashon mester tei pa tur hende, no pa esun ku su mayor por paga so! P’esei frakshon di MAN den parlamento lo vigilá e situashonnan aki i sigui duna sosten na UoC pa sigui kumplí ku su vishon i mishon pa nos por logra haña profeshonalnan prepará den nos propio universidat i ku ta komprondé nos komunidat.