Na luna di òktober
Na luna di òktober, Tourism Corporation Bonaire (TCB) a duna rekonosementu na ocho wéspet i un grupo di buseo komo embahador di Boneiru. Esaki den kategoria di bròns, oro i platina.
Den kategoria di bròns a rekonosé Tim Proffitt pa su 12 aña di bishita na Boneiru. Den su deklarashon Tim a enfatisá di ta enkantá ku e karakter relahante di nos isla i e libertat di por hasi buseo kantu di laman.
William i Susan Guyer tambe a bishitá Boneiru pa di 12 aña konsekutivo. Pa nan Boneiru ta ofresé sitionan bunita pa buseo, gastronomia di nos isla ta espektakular i nos hendenan ta èkstra amabel.
William Vogel a risibí e honor pa 14 aña di bishita na nos isla. Tur aña e tambe ta forma parti di un grupo di buseo ku ta bini Boneiru regularmente.
Feneta di oro a keda otorgá na Edward Brockenbrough ku ta bishitando nos isla pa 25 aña kaba. Tambe a honra Dive Group Calypso pa e 25 aña ku nan ta bishitá Boneiru.
E distinshon di mas haltu a keda otorgá na tres bishitante, esta Ric Minturn ku ta bishitando nos isla pa 30 aña, Mike Marks pa 31 aña i Patricia Vogel ku 32 aña di bishita na Boneiru.
Pa TCB, Helen Mercera-Thode a ofisialisá e seremonianan i a hasi entrega di e fenetanan i plakatnan korespondiente na nos embahadornan nobo.
