For di 13 te 15 di novèmber Tourism Corporation Bonaire (TCB) tabatin oportunidat pa duna un presentashon úniko pa 120 konsehero independiente di biahe (ZRA’s) di TUI durante nan di 12,5 aniversario di TUI at Home. E enkuentro, ku a tuma lugá na Disneyland Paris, a marka un oportunidat úniko pa TCB pa drenta personalmente den kontakto ku e profeshonalnan di biahe akí i pone e bunita isla Boneiru den spòtlait.
E evento a brinda TCB un oportunidat ekselente pa presentá Boneiru komo un destinashon ideal pa biahero. Pa medio di komuniká direktamente ku e konseheronan independiente di biahe di TUI, TCB a spera di no solamente fortifiká e lasonan ku TUI, pero tambe pa engrandesé Boneiru su popularidat. Komo e úniko destinashon, Boneiru su presensia tabata notabel loke a hala hopi atenshon. Di TCB, Miles Mercera – Direktor, Marjolein Oleana – Business Manager & Europe Liaison i Elesier Angel – Cruise & Project Coördinator tabata presente.
E konseheronan independiente di biahe, ku ta forma un konekshon krusial entre destinashon di biahe i kliente, tabata un públiko esensial pa TCB. E kontakto direkto ku e grupo akí tin ku nan klientenan, ta hasi nan un partner balioso den promoshon di Boneiru komo un destinashon úniko i atraktivo. TCB a rekonosé e balor di kolaborashon ku e konseheronan independiente di biahe i a konsiderá e presentashon akí komo un zèt stratégiko pa promové nos isla den un forma personal i efektivo. E evento a pèrmití e konseheronan independiente di biahe pa for di e fuente outéntiko sera konosí ku e enkanto i karakterístikanan úniko di Boneiru, loke ta hasi posibel pa nan por duna mihó konseho na nan klientenan tokante e destinashon spesial akí.
Durante e presentashon TCB a duna splikashon tokante Boneiru su karakterístikanan spesial, ku ta varia di bunitesa natural impreshonante te eksperensianan kultural riku i vários posibilidat di rekreashon.
E di 12,5 aniversario di TUI na Disneyland Paris no solamente a brinda un ambiente festivo, pero tambe un konteksto ideal pa fortifiká e kolaborashon entre TCB i TUI. Boneiru su presensia prominente komo destinashon invitá durante e evento di aniversario akí, a kontribuí na fortifikashon di e lasonan entre e dos organisashonnan.
