Bou e tema ‘Sint y Piet Trece Color’, Minister di Cultura, Xiomara Maduro, tabata presente pa duna bonbini na Sinterklaas y su 85 Pietnan di color den un evento yena cu alegria y curiosidad di nos muchanan. E celebracion di e aña aki tabata aun mas special, cu participacion di 85 Piet di color, agregando un toke vibrante y diverso na e parada aki.
E parada, cu a cuminsa na APA y a finalisa na Renaissance Marketplace, tabata un muestra di cultura y e spirito festivo di nos muchanan pa cu e temporada aki. Cu participacion di Massive Brassband, e evento a marca un momento importante, creando un atmosfera divertido cu a capta e esencia di e celebracion aki. Ademas, e aña aki Pitbull Productions a celebra nan di 10 aniversario hunto cu Chaz Dancers, kendenan a conmemora 25 aña di trayectoria artistico den e evento aki.
Un di e momentonan cu mas a sobresali tabata e presentacion di Casper y Xennon, kendenan a canta algun cancion pa Sinterklaas y e publico presente. E animacion tabata na encargo di Tanchi Esmee y Tio George, kendenan a mantene e multitud su atencion durante henter e evento cu nan carisma y energia. E evento a sigui cu presentacionnan di gruponan di baile, mustrando e talento y diversidad cultural di nos Pais. E evento aki no solamente tabata pa celebra e yegada di Sinterklaas, pero tambe a sirbi como un plataforma pa expresion di arte y cultura local y duna un oportunidad na nos muchanan pa experencia e magia di e temporada aki cu ta asina special pa nan.
Minister di Cultura ta gradici UNOCA, Aruba Bank, Renaissance Marketplace y CCDN pa nan sosten den realisacion di e evento magnifico aki. Un gradecimento special ta bay pa APA, DOW y KPA pa nan colaboracion y apoyo, sigurando cu e celebracion di e aña aki ta uno inolvidabel. E mandatario ta gradici tambe tur esnan cu a participa na e evento aki, reafirmando nan compromiso pa preserva y promove e tradicion aki pa nos muchanan. ‘Sint y Piet Trece Color’ no solamente tabata un celebracion di tradicion cultural, pero tambe un recuerdo di e union y diversidad cu ta caracterisa nos comunidad.
