E Ofisina Hulandes pa Turismo i Kongreso (Nederlands Bureau voor Toerisme en Congressen – NBTC) i Tourism Corporation Bonaire (TCB) dia 20 di novèmber 2023 a firma un deklarashon di intenshon ku e deseo pa traha huntu riba tereno di maneho di destinashon. Ta trata di un kolaborashon strukturá pa e periodo di 2024 – 2025, kaminda tur dos partido lo sostené i fortifiká otro pa medio di akshonnan konkreto.
E vishon nashonal riba turismo na Hulanda, formulá den e dokumentu ‘Perspectief Bestemming Nederland 2030 – Perspektiva Destinashon Hulanda 2023’, lo sirbi komo guia pa kontenido di e kolaborashon. NBTC komo organisashon di maneho di destinashon di i pa Hulanda, lo ofresé sosten na TCB den kaso di e transishon di merkadeo di destinashon pa desaroyo di destinashon i maneho di destinashon. Den esaki TCB lo duna direkshon i kontenido na e desaroyo, ehekushon i implementashon mas aleu di Perspektiva 2030 na Boneiru.
‘Pa nos e deklarashon di intenshon akí ta un paso importante den proseso di transishon di TCB di un organisashon di merkadeo pa un organisashon di maneho di destinashon i den kaso di e desaroyo mas aleu di nos isla. Na Boneiru ku entusiasmo nos ta sperando riba un futuro kolaborashon ku NBTC, i tambe riba e eksperensia, konosementu i abilidatnan di nos koleganan hulandes’, segun Miles Mercera, direktor di TCB. ‘Banda di esaki riba diferente tereno NBTC ta un tremendo partner stratégiko i ademas komo embahador di Boneiru e por trese importansia di TCB dilanti serka partidonan relevante na Hulanda.’
‘Gustosamente NBTC ta pone su konosementu disponibel pa duna sosten na momentu di implementashon di maneho di destinashon. Kada área i kada region konosé su propio desafionan ora ta trata di turismo, i meskos ta konta pa Boneiru tambe. Den e sentido akí e kolaborashon akí pa nos tambe ta un bunita oportunidat atrobe pa atkerí konosementu nobo i kompartí konosementu eksistente i trese esaki den práktika’, segun Jos Vranken, direktor general di NBTC.
Tokante Boneiru
Boneiru ta un munisipio spesial di Hulanda i huntu ku St. Eustatius i Saba e ta forma e islanan BES, yamá tambe Hulanda Karibense. Nos isla ta e promé destinashon blou na mundu i su aspirashon ta pa yega na un ekilibrio úniko entre balornan ekológiko, ekonómiko i kultural. Boneiru ta orguyoso di su naturalesa bírgen i su karakter outéntiko i ta hopi dediká na konservashon di naturalesa i sostenibilidat, i pa e motibu akí nos tin e lema It’s in our nature. Nos isla ta disponé di e parke di naturalesa protehá mas bieu di e anterior Antia Hulandes (for di 1969) i ta konosí komo un paradiso di buseo i komo un di e islanan di área karibense ku ta duna mihó kuido na su medio ambiente. Por haña mas informashon tokante nos isla riba bonaireisland.com/nl.
