Si un hende ta burachi, of bao di efecto di droga, y e tuma un posicion contra e palabra di Dios, nos por bisa cu e no ta den su sano huicio.
Pero ora un hende den su sano huicio, voluntariamente, deliberadamente, y cu pleno conocemento ta rebeldia contra di e palabra di Dios, nos por constata cu tin presencia di inikidad.
Kico ta inikidad? Awel inikidad ta bay mas profundo cu simplemente haci pica, pero ta para riba , ta defende maldad y inmoralidad,rebeldia contra Dios y mas cu tur cos kier hala hende hiba den scuridad y perdicion.
Hende cu ta rechasa di wordo goberna door di Dios, pero cu ta expone nan bida na e peligro di perdicion, y ta bofona Dios su palabra, bisando cu e palabra ta anticua, cu e palabra no ta pas den e tempo aki , pa asina nan sigi avansa den scuridad di e mundo aki.
Cual ta e interes cu un hende por tin di defende, apoya, y aproba maldad?
Kico por pone un hende bolter completamente contra Dios?
Placa y poder ta temporal y nada no ta dura pa semper.
Con por ta posibel cu maldad y inmoralidad por ta igual na bondad y santidad di Dios?
Ora nos ta papia di igualdad e ta conta pa cielo y pa tera, esey ta nifica si na tera nos ta pidi algo, den cielo tambe nos peticion mester wordo hustifica, pasobra tur cos bon ta bini di ariba.
Pasobra nos tur ta haci oracion pidiendo Dios: Cu Bo boluntad sosode na tera como na cielo.
Asina nos ta pidi un cos riba tera, sabiendo masha bon cu na cielo e ta wordo rechasa door di Dios, pa motibo di inmoralidad y rebeldia contra Dios, nos ta falta respet pa Dios.
Awor e palabra di Dios ta bisa nos claramente, cu tur esnan cu no tin amor pa e berdad, kendenan ta rechasa e berdad, nan lo perece pasobra nan no a acepta e amor pa e berdad, pa nan por wordo salba.
Pa e motibo aki Dios a manda riba nan un influencia di eror, pa nan kere mentira. Pa nan tur wordo huzga, kendenan no a kere e berdad , ma a hiba gusto den maldad.( 2 Tesalonisensenan 2:10-11-12).
Dios ta bolbe recorda nos tur den Romanonan 1:28 bisando: Y mescos cu nan no a haña necesario pa reconoce Dios, Dios a entrega nan na un mente perverso, pa nan haci cosnan cu no ta cumbini. Y nos tur por mira e 23 cosnan cu hende ta haci cuminsando den vers 29-32, y kico lo ta nan final.
Si boso no kier scucha e bos di Señor, e ora ey e man di Señor lo ta contra boso,mescos cu e tabata contra boso tatanan. ( 1 Samuel 12:15).
Ken cu practica pica, ta practica kibramento di ley tambe,y pika ta kibramento di ley.( 1Juan 3:4),
Pa gracia nos ta salba pero nos no por haci e gracia bira libertinahe pa asina biba manera nos kier.
Ningun hende cu sano huicio ,por proclama rebeldia contra Dios, pasobra esey ta un indicacion cu mal spirito ta domina su mente, pa asina hala hende, grandi y hubentud den e caminda di perdicion, nos mester para firme den oracion contra tur e tipo di cosnan asina aki , sin wak ta ken ta hacie.
Palabra di Dios ta siña nos pa: Destrui tur speculacion, y tur arogancia cu ta wordo lanta contra e conocemento di Dios.( 2 Corintionan 10;5-6).
Nos mester obedece Dios mas cu hende.( Hechonan 5:29).