Awe mainta a tuma luga detencion di Eugmar Koolman , Ta trata aki di caso di Kwihi: Eugmar tabata campaniado di ex minister Chris Romero y den ultimo eleccion tabata consehero principal di ex minister Marisol Lopez Tromp.
Ministerio publico a manda un comunicado y ta bisa lo sigiente:
Awe e ciudadado E.K. a keda deteni den un investigacion di Landsrecherche. Landsrecherche di Aruba, cu ta traha independientemente y bao autoridad di Procurador-General, ta investiga desde 1993 comportamiento posiblemente castigable di (semi-) ambtenaarnan.
Un parti importante di e tarea aki ta pa bringa corupcion. Corupcion ta ataca un pilar importante di democracia, esta, e confianza den gobierno.
Un ciudadano mester por confia cu ta trata cuidadosamente cu placa publico.
Un ciudadano mester sa cu ley ta conta pa un y tur y cu corupcion ta inacceptabel.
E investigacion Kwihi ta un investigacion tocante acuerdonan di servicionan (dienstverleningsovereenkomsten) den e periodo 2017-2021, cu a wordo cera dor di un ex-minister Transporte, Communicacion y Sector Primario cu varios personanan huridico (rechtspersonen).
Ministerio Publico ta sospecha cu diferente persona, entre nan E.K., a fraudulentamente ricibi placa di Pais Aruba via e construccion aki.
E investigacion a cuminza na februari 2021 cu huiszoekingnan na varios adres, durante cual a confisca entre otro, cargadornan di data y administracion.
E investigacion Kwihi ta continua y no ta descarta detencionnan nobo cu lo tuma luga.
