Despues di un dia exitoso unda cu reunion cu miembronan di sindicato conhuntamente cu korpschef a cana bon, president di sindicato SPA a haya un carta di vice president di sindicato SPA cu e ta entrega su carta di retiro. Esaki ta pa motibo cu tin algun dia caba cu tin un desacuerdo entre algun miembronan di sindicato y esaki a pone cu vice presidente di sindicato SPA Rolando Maduro a tuma su retiro.
Na momento cu esaki ta tuma luga e sindicato ta minoria y pa ley no por sigui fungi mas como un bestuur vigente. Awo e sindicato ta demisionario y esaki ta significa cu no por bin cu proyectonan nobo mas, pero si por keda atende loke cu ya ta e trabaonan cu ta den proceso.
Aki 3 luna pa ta precies dia 16 di februari lo mester tin un eleccion nobo pa e bestuur nobo, esaki ta significa cu esunnan cu kier postula nan mes pa bay eleccion pa sindicato di polis por haci esaki. Tur persona cu ta desea di postula nan mes mester percura pa tin un sheet di 25 persona minimo pa firma pa nan pa asina nan por drenta den e careda di eleccion.
Pa loke ta trata presidente demisionario actual di sindicato SPA no por duna contesta ainda kico lo e bay haci , pero si ta lamenta cu e vice presidente a tuma su retiro y te ainda no sa si lo bay un otro eleccion pa presidente di sindicato SPA.
