Kolegio Ehekutivo di Boneiru a tuma un desishon krusial ku ta regardá e Plan di Desaroyo Teritorial 2023. Despues di konsiderashonnan kuidadoso a disidí pa finalisá e trabounan riba e konsepto di prediseño, konforme e programa di gobernashon 2023 – 2027.
Konkretamente esaki ta nifiká ku ta kuminsá ku un Plan di Desaroyo Teritorial nobo, asina ku e base ta na òrdu. Te ora ta asina leu e Plan Di Desaroyo Boneiru 2010 ta keda aplikabel pa petishonnan ku ta andando i petishonnan nobo.
E desishon ta basá riba vários konsiderashon:
- Rumbo Teritorial Sinkronisá: Promé ku kontinuá ku e siguiente pasonan, ta esensial pa stipulá un rumbo teritorial sinkronisá, kaminda ta determiná na unda kua desaroyo ta tuma lugá.
- Kresementu di poblashon: Mester hasi un eskoho bon pensá tokante e embergadura deseá di kresementu di poblashon na nos isla.
- Programa di Desaroyo no aprobá: No a aprobá e Programa di Desaroyo Teritorial BES ku a presentá pa konsultashon ainda, di manera ku pasonan di kontinuashon no ta oportuno.
- Inventarisashon: Promé ku yega na formulashon di e plan, sierto inventarisashonnan ta nesesario, manera determinashon di e tipo i kantidat di bibienda nesesario, fasilidatnan sosial (pensa riba entre otro akohida di mucha etc.), maneho di awa i infrastruktura.
- Evaluashon Stratégiko di Medio Ambiente: Un Evaluashon Stratégiko di Medio Ambiente ta krusial i ta forma un kondishon pa inisio pa e plan nobo, ku bista riba sostenibilidat i protekshon di medio ambiente.
- Sinkronisashon ku e Programa di Desaroyo BES: E konsepto di prediseño ta pèrmití mas urbanisashon kompará ku e plan aktual, loke no ta korespondé ku e Programa di Desaroyo Teritorial BES.
Mantenshon di Plan di Desaroyo Boneiru 2010: Te na momentu ku tin un plan nobo, e Plan di Desaroyo Teritorial 2010 ta keda na vigor. Kolegio Ehekutivo ta enfatisá ku e situashon aktual no ta rekerí un desishon preparatorio, mirando ku e plan aktual te ainda ta adekuá. E aparente nesesidat pa un Plan di Desaroyo Boneiru 2023 ta surgi for di un falta di ehekushon, supervishon i mantenshon di lei (VTH) den un forma efektivo dentro di e kuadro eksistente.