Pasobra Ami ta Señor bo Dios, Kende ta sostene bo man drechi, Kende ta bisa bo: No tene miedo lo Mi yudabo.( 41:13)
Un biaha Señor a papia , dos biaha mi a tende esaki, poder ta pertenece na Dios.( Salmo 62:11).
Awendia hende tin hopi curashi cu constantemente, nan ta biba den rebeldia contra esun for di cual nan ta haña rosea.
No tin poder mas grandi na mundo cu esun di Dios, no tin hende mas poderoso cu Dios, tur pais y tur gobierno ta cay bao di poder Dios, pasobra Dios ta goberna riba tur cos.
Esun cu no ta goberna door di Dios, ta wordo goberna door di diabel, y esey ta locual tur hende ta mira ta sosode awendia, hende nan cu ta bay completamente contra e palabra y principio di Dios, y nos ta ripara cu tur locual nan ta haci , ta demostra cu e enemigo ta manifesta den nan bida.
Un cos cu ta keda hopi remarcabel cu e enemigo gusta domina hende sabi, den posicion, cu autoridad, pa asina e por husa hende asina pa sembra desobedencia, desunion, y chaos den un pais.
Bijbel ta conta nos di un cantidad di rey, cu a laga diabel cohe dominio riba nan, y asina nan gobierno tabata destructivo, nan tabatin placa, sabiduria, arma y hopi cos mas , pero nan curason tabata leu for di Dios.
Pesey nos tin cu tene bon cuenta pa nos sabiduria terenal, no hiba nos na materialismo y asina aparta nos for di e boluntad di Dios, pasobra asina e enemigo lo cohe bentaha den nos bida.
Laga nos un encurasha otro, pasobra e tempo a yega cu hende no tin respet pa Dios, y lo haci tur locual ta posibel, pa demostra ken nan ta sirbi,y esey a keda demostra cada biaha cu hende ta rebeldia contra Dios.
Pesey ta para scirbi pa tur esnan cu conoce Dios y ta mira con maldad ta avansa lo siguiente;
Sea fuerte y tene curashi, no tene miedo ni desmaya,pa motibo di e rey di Asiria ( Cual tabata un persona bao di dominio di e enemigo),ni pa motibo di henter e multitud cu ta hunto cune.
Pasobra Esun cu ta cu nos, ta mas grandi, cu esun cu ta cune. E tin solamente un brasa di carni cune, ma nos tin Señor nos Dios hunto cu nos, pa yuda nos y pa bringa nos batayanan.( 2 Cronicas 32:7-8).
Esaki ta locual nos tin di siña nos yuinan y nos nietonan , esaki ta e hoben mester sa, pa asina evita cu nan ta cay den gara den inmoralidad , pa nan no depende riba e mundo, pero depende completamente riba Dios.
Bendiciona ta e hende cu ta confia den Señor, y kende su confiansa ta den Señor.
Pasobra e lo ta manera un palo, planta canto di awa.
Cu ta manda su raisnan bay na e corida di awa.
Y cu no tin miedo ora calor bini, ma su bachinan lo ta berde.
Y den e aña di secura, e no ta preocupa, ni laga di duna fruta.( Jeremias 17:7-8).
Hobennan habri wowo y no asocia cu hende malbado y inmoral cu no kier tende di Dios, hende malbado cu no ta respeta Dios, cu solamente ta pensa riba nan mes y nan so, por fabor no desea nada cu nan tin.( 2 Timoteo 3:1-9).
Nos alma ta spera riba Señor pasobra , E ta nos yudansa y nos escudo. Laga bo misericordia keda riba nos , Oh Señor mescos cu nos ta spera den Bo.( Salmo 33:20-22).