Partisipante prosedente di organisashonnan di tur seis isla di e parti karibense di Reino i di ministerio di Asuntunan Interno i Relashonnan den Reino (BZK) a papia ku otro tokante promoshon di ekspertisio durante e promé ‘Integrity Summit Dutch Caribbean’ na Kòrsou di 30 di òktober te ku 3 di novèmber.
A palabrá ku ta bin un plataforma pa interkambio di ‘best practices’ i eksperensia diario ku e meta pa alsa nivel di ekspertisio i promové kolaborashon riba tereno di integridat den Reino.
Alrededor di 30 partisipante di 15 diferente organisashon gubernamental a akordá pa lanta un plataforma den kua tantu e paisnan outónomo komo Hulanda Karibense ta partisipá i den kua periódikamente ta interkambiá konosementu i eksperensia tokante promoshon di integridat den gobièrnu, entidatnan afiliá na gobièrnu i komunidat en general. E énfasis al respekto ta riba promoshon di ekspertisio di organisashonnan lokal ku ta atendé ku esaki. Ta bin tambe un vishon pa futuro pa sigui traha konhuntamente riba integridat na boka di trabou den organisashon gubernamental den e parti karibense di Reino.
Tabatin entre otro orador presente di ‘Huis voor Klokkenluiders’, Krus Kòrá, ‘Bureau Integriteit Amsterdam’, ‘Nyenrode Business Universiteit’, ‘Dienst Justitiële Inrichtingen’ i direktorado ‘Ambtenaar en Organisatie’ di ministerio di BZK. Eks gezaghèber i miembro di Kolegio supervishon finansiero (Cft), Glenn Thodé, a habri e kumbre ku un diskurso tokante integridat den e parti Karibense di Reino.
Kompartí eksperensia
“No por suprayá sufisientemente importansia di e ‘Integrity Summit’. Porfin tin un enkuentro di e kuater paisnan den Reino ku integridat sentral riba agènda. Abitantenan di e islanan den e parti karibense di Reino ta anhelá pa tin mandatario-, funshonario- i ámtenarnan íntegro. Pa esun ku ta traha riba promoshon di integridat ta di sumo importansia pa por tin un infrastruktura pa kompartí konosementu i eksperensia ku otro i pa duna otro sosten i kolaborá ku otro. E union di forsa pa medio di e promé ‘Integrity Summit’ ta duna mi e speransa riba un futuro ku mas integridat den komunidat,” segun Thodé.
Promoshon di ekspertisio
Meta prinsipal di e konferensia tabata pa sera konosí ku otro i promové ekspertisio di kolaboradónan di e ofisinanan di integridat di Aruba, Sint Maarten, Entidat Públiko Boneiru i Rijksdienst Caribisch Nederland, funshonarionan di integridat, investigadónan, personanan di konfiansa i di e Entidatnan Públiko Saba i Sint Eustatius, Warda Kosta Karibense, Korte Komun di Hustisia Karibense, Ministerio Públiko Karibense, Kuerpo Polisial Hulanda Karibense (KPCN), Instituto Hudisial Hulanda Karibense (JICN), Representante di Reino, Koninklijke Marechaussee (KMar), Ministerio di Maneho di Gobernashon, Planifikashon i Servisio Públiko i Ministerio di Hustisia di Kòrsou.
Promoshon di ekspertisio ta esensial, pa motibu ku ta importante pa e parti karibense di Reino traha riba e tarea pa pone integridat na nivel òf mantené integridat den organisashonnan gubernamental. Ta bai den esaki partikularmente pa e grado ku e organisashonnan ta kapas pa kombatí iregularidat (finansiero) (manera froude i korupshon) i formanan di anda indeseá (manera abuso di poder, insulto, diskriminashon, intimidashon i eksklushon), tantu preventivo komo reaktivo.
Organisashon
E idea pa e ‘Integrity Summit Dutch Caribbean’ a nase for di un nesesidat di e kolaboradónan di integridat di e parti karibense di Reino mes. Ministerio di BZK i SRA-Caribbean & Partners NV, un ofisina lokal ku ta spesialisá den entrenamentu i konseho riba tereno di integridat i kumplimentu, a organisá e kumbre.
E kumbre, ku a tuma lugá pa di promé bes, ta sirbi komo un trampolin pa un forma di kolaborashon mas struktural. E organisadónan ta papia di un siman eksitoso ku a ser risibí ku hopi entusiasmo.