CMC su problema a empeorá segun rapòrt di KPMG
Parlamento di Kòrsou a kuminsa ku tratamentu di presupuesto 2024, kaminda parlamento a hasi pregunta den komishon sentral. Frakshon di MAN a hasi preguntanan riba sifra i hasi entrega di preguntanan por esktrito riba kontenido di presupuesto 2024.
Ora nos tuma nota di presupuesto i e kontenido nos por konkluí ku e presupuesto no ta konfiabel, realistiko i aktual. Mirando ku tin diferente risiko finansiero ku nos pais tin ku no a keda inkluí den presupuesto 2024, kual parlamento a trata den komishon sentral. Nos pensamentu ta keda sostené pa konseho di CFT i Raad van Advies.
E risikonan ku ta bini dilanti ta e situashon di CMC kaminda e situashon finansiero ta delikado i tin konsekuensia pa e kuido ku tin ku keda duná na pueblo. Nos a risibi e resultado di e rapòrt di KPMG riba CMC kaminda ta konkluí ku e situashon finansiero di CMC ta hopi delikado. E rapòrt di KPMG kual a keda kla for di 18 yüli 2023 ta mustra ku CMC ta kai atras den pago di su gastunan di operashon pa motibu di falta di likides. Den mesun rosea Gobièrnu a keda ketu i no bisa nada di e rapòrt pero ta bisa ku ainda e rapòrt no ta kla. E rapòrt a keda skondi 5 luna largu.
E risiko finansiero ku CMC tin pa pais ta na rason di mas o menos 160 pa 170 mion kual ta kore pa kuenta di gobièrnu.
E solushon pa ENNIA kual Gobièrnu aktual a yega na un desishon sin hasi e kalkulashon nesesario. Pago di e debe di Covid kaminda Gobièrnu a akorda un re-finansiamentu na 5.1% di interes kual ta un 46 mion pa aña kual mester keda paga.
Di otro banada tambe tin e kompromiso di Gobièrnu na e empleado publíko pa paga e debe ku tin na dje di Loontrede, Lumpsum 3% i Indexering. For di insisio ku a traha e presupuesto no a hinka esaki aden i a kondishoná e pago di 2024 na situashon finansiero di Pais.
Pa loke ta sifranan di entrada di Gobièrnu mester ahustá esaki mirando ku Gobièrnu ta indiká di risibi sierto entradanan for di sekto di Online Gaming kual ainda e lei no a yega Parlamento pa aisna keda tratá i aprobá. Banda di esaki pa loke ta maneho finansiero tin hopi preokupashon di parti Raad van Advies pa loke ta fakturanan ku ta aparese despues ku aña pasa kual ta influensia e situashon i realidat finansiero di nos pais negativamente. A sera 2022 ku 90 mion florin di fakturanan habri kual mester a atende kun’e.
Minister di Finansa ta pidi parlamento pa aprobá un presupuesto kaminda tin mas di 43 mion riba gewone dienst pa “Onvoorziene uitgaven” i 31 mion e no por duna splikashon kiko lo hasi for di post i ta yame “Niet in te delen uitgaven”. Di otro banda e minister tin e gastu di Kabinet mas haltu kaminda ta paga 9.7 mion pa aña na mederwerker.
Den konseho di CFT ta indiká ku e presupuesto no ta realistiko, no konfiabel i no ta aktual. Basa riba esaki ta hasi apelashon pa trese e kambionan nesesario basa riba e realidat finansiero di nos pais i inklui tur e risikonan finansiero di nos pais.
E presupuesto mester reflehá un maneho pa pueblo di pueblo i ku pueblo pero basa riba e realidat finansiero di nos pais. Kaminda ta kumpli ku e obligashonnan i krea e balansa den invershon den desaroyo di ekonomia i invershon sosial i nos Sistema edukashon pa empoderá nos hendenan.
Frakshon di MAN ta supliká pa gobièrno presentá un presupuesto realistiko pa asina por haña un bista real i no bin ku esaki den pitu i pone preshon pa keda aseptá.