Dia 1 di novèmber Bonaire Hotel and Tourism Association (BONHATA) a tene
su reunion general anual na Delfins Beach Resort i a yama bon biní na vários empresa nobo den su ret di mas ku 120 miembro.
E evento anual tabata un momentu pa miembronan reflehá tokante nan prestashonnan konhunto, rekonosé e desafionan ku sektor turístiko na Boneiru ta konfrontá i wak padilanti den direkshon di oportunidatnan pa e industria floresé.
Durante su palabra di bon biní e CEO di BONHATA Veroesjka di Windt a pone énfasis riba importansia di kolaborashon den e sektor: ‘Nos miembronan no ta solamente un meskla di aktor den sektor turístiko, nan ta un bos kolektivo poderoso ku ta impulsá Boneiru den direkshon di un futuro mas próspero.’ Pa medio di uni sosten, e asosiashon por edifiká relashonnan efektivo ku e stakeholdernan di mas importante na Boneiru, di manera ku ta bira posibel pa haña un base komun i yega na solushonnan ku ta pone e desaroyo sosial, ekológiko i ekonómiko den ekilibrio ku otro.
E anochi a tira lus tambe riba e esfuersonan mas importante di atendementu ku interes bou di guia di BONHATA, kaminda ta atendé ku kestionnan ku tin influensia riba sektor turístiko di nos isla.
Desafio di konekshon aéreo
E relashon entre konekshon aéreo i inventario di kamber ta keda un desafio importante pa nos isla. ‘Haña un ekilibrio entre e dos faktornan akí ta di importansia krusial pa prosperidat di sektor turístiko na Boneiru. Si nos no atendé ku e problema akí, esaki por kondusí na un spiral deflashonario den nos sektor i e por tin impakto direkto pa e otro formanan di ekonomia na nos isla’, segun Luite Berkenbosch, presidente di direktiva di BONHATA. Na aña 2023 e asosiashon a duna un aporte grandi na solushon di e desafio akí, pa medio di kontribuí ku mas ku 200 mil dòler na e garantia di konekshon aéreo di United, loke a resultá den buelonan èkstra for di New Jersey pa Boneiru.
Diálogo Sentral
BONHATA ta representá interes di sektor turístiko komo miembro di Diálogo Sentral, un órgano di konsulta di dunadó di trabou, sindikato, gobièrnu lokal i Kámara di Komèrsio. Un di e desaroyonan di mas importante ta adaptashon di sueldo mínimo, huntu ku institushon di un mínimo sosial pa habitantenan di Boneiru. Huntu ku Business Federation Bonaire, BONHATA a purba representá vishon di e sektor pa loke ta trata e kestion akí i a boga pa manda medionan pa dunadónan di trabou pa adaptá na e kambionan drástiko.
Enbolbimentu di stakeholder
Pa adelantá riba retonan di futuro, den forma proaktivo BONHATA ta boga pa enbolbimentu di stakeholdernan relevante ku e proseso di formulashon di maneho. Por logra maneho efektivo solamente na momentu ku di tur banda tin e aporte adekuá, i aña 2023 tabata un aña krusial kaminda BONHATA a tene hopi seshon ku stakeholdernan manera STINAPA, TCB, Diálogo Sentral, Kolegio Ehekutivo di Boneiru i hopi otro organisashon na nos isla. Durante e reunion anual e miembronan por a duna input tokante tópikonan ku gustosamente nan ke mira bini dilanti den e aña binidero.
Mirando dilanti e asosiashon ta konta awor ku sosten di Arnd Chirino i Omar el Hage komo dos miembro nobo di personal. Nan binida ta marka un kapítulo nobo pa BONHATA i ta kai huntu ku un añadishon sólido di miembro nobo na nos asosiashon. Direktiva di BONHATA tambe a mira algun kambio na aña 2023 ku añadishon di Delfins Beach Resort Bonaire, representá pa Chris Opgenoort, i Vincent van der Valk a drenta direktiva pa representá asiento di Van der Valk Plaza Beach & Dive Resort Bonaire. Finalmente Tom Peeters a hala tras komo miembro apresiá di direktiva na nòmber di VANEPS Bonaire. BONHATA ta gradisí Tom Peeters pa su hopi añanan di servisio i su dedikashon.
Gobièrnu sentral i gobièrnu di Boneiru i Caribbean Hotel & Tourism Association (CHTA) ta rekonosé Bonaire Hotel and Tourism Association (BONHATA) komo e asosiashon ofisial di hotel i turismo di Boneiru. BONHATA, fundá na aña 1980, ya pa kuater dékada kaba ta kana dilanti den sektor turístiko di nos isla. Pa mas informashon bo por manda un email na info@bonhata.org.
