Aruba Hotel & Tourism Association (AHATA), den colaboracion cu Coördinatiecentrum Mensenhandel Mensensmokkel Aruba (CMMA), a organisa 2 sesion informativo pa concientisa su miembronan tocante traficacion di hende.
E sesionnan facilita pa Jeannette Richardson, Coordinado Nacional y Directora di CMMA, ta diseña pa ekipa e personal den sector di hospitalidad y turismo cu e conocemento necesario pa reconoce e señalnan di traficacion di hende y con pa denuncia un caso.
Personal di diferente departamento a participa, incluyendo Gerentenan General, Bellmen, personal di Housekeeping, personal di Recepcion, Servers, Beach Attendants y Bartenders. Di e manera aki por uni forsa y mehora e chens cu un posibel caso ta wordo indentifica y por salba un victima di nan situacion. E reaccion di e participantenan a resalta e balor y importancia di e iniciativa aki.
Di e manera aki, AHATA ta sigui inverti den e desaroyo di su miembronan y ta hunga un rol activo den e prevencion di traficacion di hende pa asina sigui mehora e seguridad no solamente den e sector di turismo, pero di tur persona riba nos isla.
AHATA ta gradici Aruba Marriott Resort & Stellaris Casino pa nan colaboracion cu e ballroom unda e sesionnan di informacion a tuma luga.
