Ta para scirbi den 2 Timoteo 3 :1-5 tocante e impiedad di e ultimo dianan: Ma sabi esaki cu den e ultimo dianan temponan trabahoso lo bini:
Pasobra hende lo ta stimado di nan mes, stimado di placa,gabado,arogante,blasfemado,desobediente na mayornan, ingrato,impio,sin amor,ireconciliabel,cu mala lenga,sin dominio propio,grosero,odiado di loke ta bon, traidor , imprudente,soberde, mas bien stimado di placer cu stimado di Dios.
Cu tin apariencia di ta religioso berde, ma cu ta nenga su poder, evita sorto di hende nan asina aki.
Locual ta para scirbi den bijbel ta cumpliendo den nos bista, pesey awor mas cu nunca nos mester biba cu wowo habri mirando e tempo y buscando mas di Dios, biba conciente,pa asina evita di cay den trampa di scuridad, pasobra di berdad e dianan ta malo.
E aumento di violencia, maldad, inmoralidad, tambe tin su efecto riba nos hubentud, pasobra caminda tin falta di conocemento di palabra, y rebeldia, e enemigo ta tuma mente y curason over di nos hubentud y awor nos por mira e fruta nan.
No ta nada dushi, tampoco nada bunita, di mira video ta wordo graba di pelea di hobennan, tanto mucha homber como mucha muher, yena cu palabra sushi. con peleanan ta wordo prepara manera pelicula, y con nos hubentud ta agredi otro, como sifuera ta manera animal nan ta biba.
Di unda tanto odio,rivalidad y maldad a sali?
Dicon no ta posibel reconcilia y biba na pas cu otro?
Di unda a sali cu tur cos tin di caba na pelea y arma?
Nan no ta ripara cu no tin nada bon den e asunto aki?
Si hende grandi tampoco ta duna mihor ehempel, pasobra violencia relacional a aumente, y violencia domestico tey keto bay, nos ta mira dicon tin tanto rabia asina bao di nos hubentud.
Husticia di e hende perfecto lo dirigi su caminda, ma e malbado lo cay pa medio di su mes maldad.(Proverbionan 11:5).
Ta berdad cu e hubentud di awendia mester di Dios, esey ta rond mundo, pasobra e forsanan di maldad, ta constantemente bezig pa wak con nan por domina nos hubentud, cu cos nan malo, impuro, y inmoral pa asina aleha na for di Dios.
Pero nos como mayor no por entrega, nos ta yama pa perservera, pasobra si e mayor no lanta riba y haci tur esfuerso, pa lanta nan yiu decente y integro ta ken lo hacie pa e mucha?
Nos hubentud mester yega na e conocemento aki ; Nunca paga malo cu malo na ningun hende. Respeta loke ta corecto den bista di tur hende. Si ta posibel asina leu cu ta depende di boso, sea na pas cu tur hende.( Romanonan 12:17-18).
Bin yuinan y scuchami, lo mi siña boso e temor di Señor.
Ta ken ta e hende cu ta desea bida, y stima bida largo, pa e por mira bondad?
Warda bo lenga di maldad, y bo lepnan di papia engaño.
Aparta bo mes for di maldad y haci bon, busca pas y siguie.( Salmo 34:11-14).
Ta tempo pa cada mayor papia cu nan yiu, y tuma tempo pa splica, tur e consecuencia di maldad,tanto pa awor como den futuro,pasobra locual bo sembra awe, mayan por causa bo libertad.
Wardami O Señor for di man di e malbadonan, proteha mi contra hende violento, cu a planea pa haci mi pianan trompeca.( Salmo 140:4).
Di berdad , di berdad, dianan ta dificil, dianan ta trabahoso, pero nos no tin cu perde speransa, pasobra cada ken cu yega serca Dios pa yudansa, Dios su man semper ta habri pa yuda su yiunan.
Señor tuma control.
