Reunionnan den comision di famia a cuminsa riba un topico hopi delicado. Pa algun di nos den comunidad cu ta bastante controversial y delicado, pero tambe tin algun persona cu ta haya cu e ta un topico Tabu y cu no ta papia hopi riba dje. Ta trata aki di e topico di matrimonio di mes un sexo.
Den comision di famia den parlamento manera semper ta haci cu leynan cu tin impactonan grandi pa comunidad di Aruba semper parlamento ta amplia e comisionnan specificamente pa scucha stakeholdersnan di kico ta nan pensamento nan,preocupacionnan,cambionan cu nan kier mira, remarcanan cu nan tin sea ta riba ley of maneho pero tambe e preocupacion cu nan tin como ciudadano di Pais Aruba.
E reunion a keda yama mirando cu tabatin peticionnan haci pa esaki pasa y e prome reunion cu a tuma luga ta di obispo di Willemstad cu a haci e peticion na nomber di e iglesianan catolico di Aruba y di Curaçao pa ta presente pa asina hiba un dialogo cu parlamento riba e tematica di matrimonio di mes un sexo.
Comision di famia den parlamento a duna e reunion aki y na mes momento a drenta cartanan di iglesianan cristian na Aruba cu ta hiba e mes un direccion di pensamento cu kier sinta y dialoga debati y trece nan remarca riba e tematica di ley di matrimonio di mes un sexo.
Sinembargo e intencion ta pa tambe acerca departamento di hoben y famia pa asina haya sa kico nan ta pensa riba un ley asina aki mirando cu nan ta trata y atende cu hobennan na Aruba. Na mes momento ta kere cu ta importante pa acerca stakeholder nan y esunnan cu ta representa e grupo di LGBT Q pa asina tambe sa nan pensamento nan riba e matrimonio di mes un sexo.
Mester bisa cu e reunionnan a cuminsa y e idea ta den un siman por sinta mas cu un dia mirando tur e peticionnan cu a bin riba mesa. Tur esaki ta bon pa tin pa tin suficiente conocemento prome cu trata e ley den parlamento. Di e manera aki tin un indicacion tambe con e comunidad ta pensa riba e tematica aki di matrimonio di mes un sexo.
Tambe por a compronde cu tin un total di 18 mil ciudadano cu a entrega firma y a haci un peticion pa bay casacion, pero a compronde cu tin entre 10 pa 12 di november por trata e casacion na Pais Hulanda. Aruba lo warda pa asina haya sa kico ta e resultado di casacion pa e ora por sa kico ta e pasonan cu mester continua aki na pais Aruba.
Sinembargo parlamento di Aruba ya caba ta haciendo di su parti cu comisionnan unda cu ta busca opinion, remarcanan y intrankilidad nan of pensamento nan cu tin riba e tematica di ley di matrimonio di mes un sexo.
