Parlamento di Sint Maarten a ricibi colega parlamentario di e paisnan Aruba y Curaçao pa discusion tripartiet.
E meta di e reunion tripartiet ta pa prepara pa e Consulta Interparlamentario di Reino y tambe pa discuti topiconan di interes mutuo. Durante e reunion tripartiet di februari 2023, e delegacionnan a yega na un acuerdo pa reuni mas frecuentemente, loke lo nifica tres reunion personal y un reunion virtual pa aña. E reunion cu a tuma luga na Sint Maarten tabata e prome reunion personal adicional for di e decision na februari 2023.
E dia a cuminsa cu un discurso di apertura di e Presidente di Parlamento di Sint Maarten, sr. Sidharth M. Bijlani. Durante su discurso, e Presidente a yama e delegadonan na e isla bon bini y a declara e discusionnan tripartiet habri. Despues di esaki, presidente di e parlamentonan di Aruba y Curaçao a duna un introduccion cortico, durante cua e dos paisnan a splica brevemente nan expectativanan pa e discusionnan di e dia.
Durante oranan di mainta a trata temanan manera presentacion di Sra. Joanne Christiaans, gerente di programa di Dutch Caribbean Cooperation of Airports (DCCA). Durante su presentacion, Sra. Christiaans a informa miembronan di e delegacionnan riba e ambicion comparti di e partnernan di DCCA pa traha den colaboracion pa logra biahe aereo asequibel, eficiente y sostenibel entre e islanan di Caribe Hulandes.
Despues di un interupcion pa lunch, e programa a sigui cu un presentacion y discusion cu e Minister di Salubridad Publico, Desaroyo Social y Labor di Sint Maarten, sr. Omar E.C. Ottley, tocante e progreso di e Caribbean HUB pa Salud Publico, maneho di crisis y desaster, capacidad di personal di cuido medico, y e Dutch Caribbean Hospital Alliance (DCHA).
Otro temanan di discusion tabata, entre otro, reaccion riba e acuerdo di e tripartiet anterior, progreso riba e regulacion di disputa, uso di leynan di Reino di consenso como un medio di control, reorganisacion di e sistemanan di impuesto den e paisnan basa riba e paketenan pa pais y den contexto di e rol parlamentario: e posibel caminda cu mester ser sigui cu e meta di alivia pobresa.
E discusionnan tripartiet a termina cu un conferencia di prensa cu presencia di prensa local y regional den forma presencial y virtual.
Otro eventonan relaciona cu e discusion tripartiet tabata un bonbini cu a tuma luga riba diamars, 23 di october, y un momento di foto di grupo di tur delegacion, incluyendo miembronan di Parlamento di Sint Maarten, cu tabata presente como observador.
E reunion tripartiet aki a keda presidi pa e Presidente di e Comision di Asuntonan di Reino y Relacion Interparlamentario di Parlamento, Sr. William V. Marlin.
