Hepaleeee! Lady Ruth a malcria nos lectornan cu bunita noticianan social cultural di varios celebracionnan cu a tuma lugar y cu lo tuma lugar, cu awor nan ta desea di sigui lesa nos relatonan di temanan social cultural. Ta hopi biaha nos a skirbi di e anochinan di Poesia y of un bunita concierto y of show cu a tuma lugar den Cas di Cultura. Varios ta e lectornan cu a laga nos sa, cu nos relatonan ta relaha nan masha hopi mes. Nos tambe sa, cu prensa no por skirbi y of publica cosnan cu ta relaha mente di hende so, nan tin cu relata noticianan di polis y of di temanan politico tambe, pa concientisa y re educa nos pueblo, djies pa menciona algun. Danki na tecnologia cu nos por a sigui manda nos relatonan , aunke nos no tawata na Aruba., pero cu temanan pendiente pa a skirbi di nan. Y una bes priminti nos ta purba di cumpli y ta contento ora nos hanja “feedback” di lectornan serca y leu, pasobra awor nos relatonan ta on line tambe, danki na EANews, cu por wordo lesa na varios otro islanan den Caribe y tambe Hulanda. Pa ora cu e relato aki wordo publica, nos lo ta bek caba na cas probablemente cu un curason parti den dos atrobe y cu wowonan muha di lagrimanan di nostalgia pa otro despedida pero tambe di alegria di por a comparti tempo di calidad cu nos famianan na Hulanda. Un di e bunita momentonan cu nos por menciona, ta, e anochi cu nos por a celebra cu nos tio Andre Bergen, “Oom Boy” kende a cumpli su di 89 anja di edad, pero cu un mente y estado fisico bon bon ainda, cocochando un crenchi cu e pianan, pero, ta cana y move den su cas manera e kier. Nos a pasa hopi dushi mes cu su distinguida sra.esposa “Tante Gerrie” y presente tawatatei tambe Johnny , un di e yiu hombernan , cu su nomber artistico Juan Montanjas, pa su hopi bishitanan na Spanja. ( Sorry, pero mi no sa con pa type e nje, enje) y tambe Donald, un di e talentoso nietonan. Johnny ta realisa hopi bunita grabacionnan di naturaleza bunita y artistanan na Spanja. Ki dushi ta pa por a sinta combersa cu nan tur. Nos por a saborea dushi bolo di pruim y di cashupete traha pa nos bunita prima Sabrina, manera su bunita mama defunto Chichi tawata traha. Despues nos lo bin cu mas di Hulanda. E pais gusta pa hopi arubiano cu a scoge pa a bay studia y keda traha y biba, forma nan hogar ayanan. Danki pa lesa nos relato di e siman aki, danki pa tur bon comentario ricibi pa cu nos relatonan anterior. Un cos Lady Ruth por bisa di henter su curason, ta, cu , tur dia ta “mooi weer” p’e na Hulanda, pasobra e por brasa su yiunan y nietonan tur dia di su vakantie. Awa por ta jobe, shelo por ta shinishi, por hasi un crenchi friuw, pero e dushi solo cayente color bunita ta den su mente, alma y curazon. Dios ta bon. Dios semper ta bon. Y ta den Su mannan nos bida ta. Dios ta amor. Un “bearhug “ di Lady Ruth.
