Ministerio Publico a tuma nota di declaracionnan di Joran van der Sloot via media, pero no a wordo poni oficialmente na haltura ainda dor di autoridadnan Mericano. Pesey mes OM a saca awe un asina yama rechtshulpverzoek na US Department of Justice pa haya tur documento di Corte y tur documento cu tin di haber cu e investigacion.
Ministerio publico na Aruba ta sigui e caso aki di cerca mirando cu na Aruba ainda e caso ta habri ainda.
Manera nos tur sa Joran van der Sloot (36) a confesa cu el a mata e adolescente Mericano Natalee Holloway na Aruba na 2005. E a haci e confesion aki na cambio di reduccion di sentencia den un caso di extorshon, cu e tabata den corte pe na Merca.
E caso di Natlee Holloway tabata uno grandi na momento cu a disparce na Aruba na 2005, despues cu el a sali for di un club di anochi cu Van der Sloot y dos otro homber a bay cu e hoben canto di beach. E ta ser considera morto, pero su curpa nunca a wordo haña.
E caso na Aruba ainda ta habri y e chens cu Aruba lo bay husga Joran van der Sloot a base di su ultimo confesion no ta grandi. El a confesa masha biaha y tur biaha a resulta cu un confesion asina no tabata sostene pa prueba y den casonan asina no por haci nada.
Pero hasta si tin suficiente evidencia, e caso lo no por wordo condena. Joran tabata menor di 17 aña ora el a mata Holloway, y pa e motibo ey su caso a bira bieu. Sinembargo, eventualmente corte por dicidi pa husga e persona aki bou di ley di adulto ainda. E desaroyonan cu ta tumando luga sigur ta interesante ya cu no ta prome biaha Joran van der Sloot ta testigua pero cu na final ta resulta cu no ta berdad.
Ministerio Publico di Aruba a pidi tur documento pa asina mira e caso y e declaracionnan cu a tuma luga. Kico esaki ta significa pa Joran Van der Sloot no ta conoci ainda.
Tambe por a tuma nota di declaracionnan di Kees van der Spek cu a traha pa hopi aña como man drechi di Peter R. de Vries riba su programanan y a haci diferente investigacionnan rond di e caso aki. Publicamente Kees van der Spek ta duna di conoce cu e no ta kere den e declaracion di Joran van der Sloot.
Den pasado Joran van der Sloot a declara e la acepta solamente cu el a bira malo y cu el a kita e curpa”, Van der Spek a bisa riba diahuebs den e programa di mainta di Mart Meijer y Sophie Hijlkema riba NPO 3FM. “Mi ta sigui kere cu esaki ta e berdad, cu el a bira malo y cu el a kita e curpa”.
Sinembargo te ainda no tin curpa, no tin prueba di loke cu Joran van der Sloot a duna di conoce ta berdad. No ta conoci awo cu e declaracion aki cu Joran a haci awo e caso por cera y esaki ta significa cu oficialmente nan lo declara Natalee Holloway morto y si acaso cu e mama por cobra seguro di bida di Natalee Holloway si esaki ta existi.
Den e declaracion cu e mama a haci por a mira tambe cu tin un alegria enbes di un tristesa, ta remarcanan cu husticia kisas por tuma pone bon cuenta riba dje.
Una vez e autoridadnan Mericano manda Ministerio Publico di Aruba e documentonan cu tin di haber cu e investigacion cu nan a hiba na Merca, OM lo bay studia nan y analisa nan pa wak ki decisionnan procedura lo por of mester tuma.