Tourism Corporation Bonaire (TCB) a anunsiá lansamentu di su programa di prueba nobo ku ta enfoká riba mehorashon di eksperensia di tantu nos bishitantenan komo nos habitantenan. Komo parti di nos aspirashon pa mehorá fasilidatnan públiko, e tualètnan di marka ‘It’s in Our Nature’ a hasi nan debut riba Waf Nelson Petrus ‘Nello’ Craane, konosí tambe komo Waf di Sùit.
Introdukshon di e tualètnan públiko akí ta un logro importante den e strategia di desaroyo di produkto di Tourism Corporation Bonaire i ta mustra nos dedikashon pa hasi Boneiru un destinashon ku ta mas hospitalario i mas aksesibel. A diseñá e tualètnan públiko pa kumpli ku e nesesidatnan diverso di tur hende, ku aksesibilidat pa ròlstul i e normanan sanitario di mas haltu.
Ku e programa di prueba akí, ku ta dura te luna di desèmber 2023, nos por akumulá konosementu balioso tokante patronchinan di uso i orario di operashon. Nos ta kontentu di por amplia e proyekto akí pa medio di indiká lokalidatnan èkstra den kurso di luna di yanüari 2024 pa e tualètnan di ‘It’s in Our Nature’, di manera ku mas tantu sitio ainda na nos isla lo probechá di e inisiativa akí.
Den e promé fase di e programa di prueba, e tualètnan públiko akí lo ta habrí durante temporada krusero, spesífikamente durante e oranan ku ta hasi uso di e waf. E desishon stratégiko akí tin komo meta pa akomodá tantu bishitantenan krusero komo bishitantenan ‘stayover’ i nos habitantenan lokal.
E tualètnan ta aksesibel grátis tambe pa tur stakeholder krusero ku un badge krusero ofisial i ku ta traha na e terminal krusero, manera shofùrnan di taksi, operadornan di tour, agentenan di terminal krusero i personal di siguridat. TCB ta di opinion ku tantu nos stakeholdernan komo nos partnernan lo tin benefisio di esaki.
Segun TCB esaki ta un paso den bon direkshon pa mehorá e eksperensia en general di tur hende ku ta disfrutá di nos bunita isla.
