Respet no ta keda na palabra solamente, pero e ta un gran hecho humano, den cual educacion ta wordo demostra den gran forma.
Respet ta bini di Dios, un cas sin respet no por keda para riba su pia, un mucha sin respet awe , ta un hende grandi sin caracter y integridad mayan.
Un matrimonio sin respet pa otro ta riba caminda di separacion.
Den tur cos respet mester tey, sea bo no ta di acuerdo cu otro pero mantene respet , pa otro pasobra dilanti di Dios nos tur ta igual.
Pa falta di respet accidente ta tuma lugar, wak den trafico cuanto falta di respet ta tuma lugar, un hende ta corre auto iresponsabel, provocando otro , y asina causa accidente.
E falta di respet creciente ta un preocupacion hopi grandi, pasobra caminda no tin respet no tin crecemento.
E plan di diabel ta pa falta di respet aumenta barbaramente, y asina causa caos den famia, matrimonio y den sociedad .
Pasobra un hende cu no tin respet pa Dios y tampoco pa su prohimo, ta un persona cu ta biba den un scuridad profundo, y asina e enemigo ta cohe bentaha den su bida.
Falta di respet ta hiba hende na inmoralidad, caminda nan ta pensa cu tur cos por y cu nada no ta bini afo, pasobra mi por haci locual cu mi kier, pero den bista di Dios no ta asina.
Den tur bida parandero y mediocre, falta di respet ta hunga e rol principal, caminda tin impuresa,orguyo, perversidad y arogancia falta di respet ta sinta riba un trono.
Bo tabata sa cu yegamento laat cada rado ta un falta di respet, y cu esey bo ta demostra cu bo no ta balora locual cu bo ta bay haci , ni tampoco e persona cu bo ta bay topa cune.
Respet den cas di Dios, ta algo primordial, yega na tempo pa alaba Dios, ta un gran bendicion pa nos bida, pasobra esey ta demostra cu nos no ta trata Dios con cu ta.
Bisti decente tur momento, y especialmente den cas di Dios, ta desmostra respet y temor di Dios, y cu nos ta balora nos curpa, cual ta tempel di Dios, pasobra e Spirito di Dios ta biba den dje.
Tur mucha cu wordo lanta sin respet, ta un cosecha di dolor pa nan mayornan na grandi, pero tambe ta un golpi pa comunidad, pasobra e no por duna e bondad locual ta spera di dje.
Pasobra hende cu no tin respet ta festeha den nan engaño, keriendo cu e Palabra di Dios no ta pa nan y na ta sigi gaña nan mes y wordo engaña, pasobra caminda cu no tin respet e Spirito di Dios no tey.
Un persona sin respet cu ta biba den pica, no por coregi otro, pasobra e no por duna ehempel na otro pa haci bon, mientras cu den scondi e no kier bandona su sushedad. ( Proverbionan 30:12).
Bendiciona ta e hende cu semper tin temor, ma esun cu haci su curason duro lo cay den calamidad.
(Provernionan 28:14).
Esun cu ta reprende un hende,despues lo haña mas apresio , cu esun cu ta labia cu su lenga.(Proverbionan 28:21).
Ta deseo di Dios pa tur hende wordo salba, y yega na conocemento di e berdad. Pasobra ta un Dios so tin y un Mediador tambe entre Dios y hende, e Hende Cristo Hesus. ( 1 Timoteo 2:4-5).
Respet pa Dios y pa nos prohimo, ta trece bendicion tur caminda, pasobra Dios ta amor y den dje no tin nada, nada di scuridad.