Plantashi Fòntein ta mas ku djis un pida tereno; e ta un página for di Boneiru su storia kolorido. Ku e kompra resien di parti di Entidat Públiko Boneiru e storia akí ta haña un kapítulo nobo. Fòntein semper kaba tabata un sitio kaminda abitantenan di nos isla tabata bai pa tene piknik, selebrá fiesta i atmirá Boneiru su bunitesa natural.
Plantashi Fòntein konosé un historia agríkola riku. Un tempu e tabata un área di agrikultura floresiente ku tabata duna kuminda na e komunidat lokal. Segun tempu tabata pasa, el a bira un sitio favorito pa rekreashon. E diputadonan Thielman, Kroon i Craane a papia tokante e laso emoshonal ku bonerianonan tin ku Fòntein. ‘Rekuerdonan di Fòntein ta bibu den memoria i kurason di hopi famia ku a bishitá Fòntein pa tene piknik òf simplemente pa selebrá momentunan spesial,’ asina nan a kompartí.
Ku kompra di Plantashi Fòntein, Entidat Públiko Boneiru ta primintí di tesorá i protehá e pida patrimonio akí. Tin plan kla pa konservá e balor natural i kultural di e área i na mes momentu konstruí un futuro sostenibel pa nos isla.
Kompra di Plantashi Fòntein ta un homenahe na su historia riku i un paso den direkshon di un futuro mas bèrdè i mas sostenibel. Ku e tumamentu over akí di parti di Entidat Públiko Boneiru, e parti asina stimá akí di Boneiru ta haña e oportunidat pa tantu duna honor na pasado komo pa bòltu un página nobo na kaminda pa un futuro yen di speransa.
