E siman cu a pasa minister Oduber tawata di bishita na Carnival Cruise lines y tambe Florida Caribbean Cruise lines Association (FCCA) hunto cu CEO di APA sr. Figaroa, COO di APA sr. Arends y tambe sr. Melchiors cu a representa ATA pa discuti e cruise passenger fee (CPF) y tambe haci un presentacion di tur e proyectonan di upgrading di producto Aruba. E CPF ta e fee cu barconan crucero ta paga APA pa cada pasehero cu drenta Aruba. E entradanan aki ta wordo inverti pa APA pa mehora e experiencia di e turista crucero.
Den e cuadro aki a bishita Carnival Cruise lines y FCCA pa discuti e tema importante aki y pa comparti cu nan e direccion cu pais Aruba ta bai. Na mes momento a duna un presentacion hopi amplio di tur e proyectonan di mehoracion y upgrading di infrastructura cu ta den ehecucion y tambe den pipeline.
Carnival cruise lines tambe a duna e delegacion un update di aña 2023 y tambe nan proyeccionan pa aña 2024. Banda di esaki a comparti tambe nan guest satisfaction di nan pasaheronan ora nan bishita Aruba.
Pa loke ta aña 2023 esaki tawata uno hopi positivo pa Carnival Cruise. Aruba lo ricibi mas di 210.000 pasahero e aña aki di Carnival y esaki ta un aumento drastico compara cu aña 2022.
Pa aña 2024 nan a comparti cu e delegacion cu Aruba lo bai experiencia un aumento di 30% asina surpasando 250.000 turista crucero di Carnival Cruise
lines so.
Nos tawata contento pa scucha cu Carnival cruise lines, mescos tawata e caso cu Royal Caribbean, Norwegian, Disney Cruise lines, Princess Cruise lines, Holland America y Ritz Carlton, nan tambe lo bai aumenta nan cantidad di calls y pasaheronan pa aña 2024. Aruba ta keda un destinacion hopi gusta pa turistanan crucero y nan ta menciona cu esaki ta danki na tur e inversionan cu ta wordo haci pa mehora y eleva product Aruba. Nan ta considera e hecho cu tin inversionan continuo como algo sumamente positivo pa nan bishitantenan.
Sra. Michele Paige cu ta CEO di FCCA a informa nos cu Aruba ta wordo considera un destinacion di calidad halto pa liñanan crucero y nan a bisa cu Aruba ta keda ‘’high in demand’’. Nan a gradici nos pa e partnership, pa e stabilidad politico cu Aruba ta brinda y tambe pa tur e inversionan cu ta wordo haci pa ofece un miho experiencia pa e tutista crucero. Sigur un siman hopi exitoso pa loke ta turismo crucero pa Aruba.
