Museo di Industria a inclui e parti di historia importante di industria di koffie den nan exposición
Diadomingo dia 1 di oktober ultimo tabata Dia Internacional di Koffie y relaciona cu e dia aki Fundacion Museo Aruba y Ministerio di cultural a organisa e prome Sani Coffee Fest cual a resulta un exito grandi. E evento aki a tuma luga na Museo di Industria na San Nicolas.
Den añanan 60 y 70 Aruba tabata un exportado grandi di koffie Colombiano. E negoshi di koffie na Aruba tabata grandi y diadomingo ultimo Gobierno di Aruba pa medio di Minister di Cultura a brinda homenahe na e pioneronan den e industria aki. Tambe a wordo anuncia un exposicion di e industria di koffie na Aruba den Museo di Industria pa asina un y tur cu ta bishita nos museo di industria por haya sa mas di Aruba su historia di negoshi di koffie.
E prome parti di e programa a tuma luga den e sala principal di Museo di Industria na unda Minister di Cultura Xiomara Maduro a hiba palabra elaborando riba e Dia Internacional di Koffie, un dia cu a wordo propone pa e Organisacion Internacional di Koffie (ICO). Un dia pa para keto y conmemora e producto koffie y tur esnan cu ta gusta bebe koffie, e comerciantenan di koffie y tambe pa apoya tur esnan cu ta cultiva koffie.
Minister di Cultura a haci uso di e oportunidad pa gradici un y tur cu ta apoya y contribui na e producto koffie cu hopi hende ta bebe, rond mundo. E mandatario a trece dilanti cu tin hopi pais rond mundo cu ta cultiva koffie, manera entre otro Brazil, Honduras, Mexico, Peru, Vietnam, Indonesia, Etiopia, India, Ugando den Africa y tambe Colombia. Na varios di e paisnan aki ta organisa actividadnan tocante koffie riba e dia aki. Segun Minister Maduro un kop’i koffie ta un ritual social den nos cultura. E dushi aroma di koffie ta nifica cu e dia a cuminsa. Hopi hende mester di nan kop’i koffie pa nan inicia e dia y funciona bon durante dia. Pero no ta balor cultural y social so koffie tin cerca nos.
Industria di Koffie na Aruba
Den su discurso Minister Maduro a relata un poco di e historia di industria di koffie na Aruba na unda ela trece dilanti cu nos Pais Aruba tabatin un rol hopi importante den exportacion di koffie door di e ubicacion strategicamente di nos País. Apesar cu na Aruba no a planta un mata of boonchi di koffie aki, Aruba tabata un exportador grandi di koffie nos region. Pais Aruba tabata importa e koffie di Colombia, prepar’e y export’e pa varios Pais rond mundo. Asina den añanan 60 y 70 e industria di koffie a florece na nos País, danki na creatividad di e comerciantenan di Pais Aruba.
E negoshi di koffie aki tabatin su impacto riba desaroyo economico y social di País Aruba. Pa e motibo ey Museo di Industria a inclui e parti di historia importante tambe den nan exposicion, pa asina e historia aki por keda conserva y wordo conta na tanto nos localnan como turistanan. Segun e mandatario cu e plan ta pa otro aña tin un exposicion mas grandi pa locual ta trata e industria di koffie.
