Tourism Corporation Bonaire (TCB) a organisá su promé Bonaire International Tourism Conference (BITC). Esaki tabata un tremendo oportunidat pa komersiantenan por mayor, operadornan di tour, agensianan di biahe i partnernan turístiko pa eksperensiá e produkto úniko ku Boneiru ta ofresé na su bishitantenan i pa topa ku partnernan for di sektor privá. Nan a siña mas tokante Boneiru su strategianan nobo di merkadeo, nan por a eksplorá kiko Boneiru tin di ofresé tantu pa loke ta trata produkto komo propiedat, nan a topa partnernan lokal nobo i nan a trese oportunidatnan komersial nobo pa Boneiru.
E siman a kuminsá ku un Tourism After 5 plasentero i yen di ambiente. Esaki ta un happy hour pa sektor di turismo ku Plaza Beach & Dive Resort a organisá. E partnernan internashonal i e invitadonan por a sera konosí ku partnernan lokal i ku otro. Despues di e Tourism After 5 tabatin un sena di bon biní pa e partnernan internashonal ku TCB i Plaza Beach Resort a organisá. E siguiente dia, 26 di sèptèmber, e partnernan internashonal tabatin oportunidat pa topa e partnernan di e sektor turístiko di nos isla den un kòmbersashon personal i privá durante un Let’s Meet & Flamingle Business Speed-date, kaminda a papia tokante partnership i oportunidatnan komersial nobo, entre otro diferente manera pa stimulá benta.
Banda di esaki e partnernan a partisipá na e Bonaire Tourism Summit anual, kaminda nan a haña sa mas tokante e plannan ku Boneiru tin pa airlift, e akshonnan i e strategia pa desaroyo di turismo, e situashon aktual den e sektor i e resultadonan i plannan pa futuro.
E partnernan internashonal ku a forma parti di e BITC ta:
ABC Travel Nederland
Bonaire Pros
Caradonna Adventures
Maduro Dive
PADI Media Group
Reismedia Nederland
TUI Group
WestJet
Gustosamentu TCB ke ekspresá un palabra spesial di gradisimentu na Pickup Huren Bonaire i tur e partnernan local ku a kontribuí na e éksito di e BITC.
