E delegashon di Bonaire Human Rights Organization a embarká riba e di 3 fase i ta awor di 505 dia riba e pilgrimage pa lòbi den Amerika Latino i Karibe pa pone Boneiru riba lista di Teritorionan-Sin-Propio-Gobernashon di Nashonnan Uní. Diadumigu último e delegashon a biaha pa Sint Maarten.
Na Desèmber 2022, e gobièrnu Hulandes públikamente a primintí un limosna den un biaha di $200 mion, komo kompensashon pa nan krimennan di sklabitut. Awor Hulanda a redusí e montante te na $5 mion. Klaramente esaki no ta reparashon sino manipulashon i traishon di nos ansestronan na e nivel mas haltu.
Na 19 di desèmber 2022, e gobièrnu Hulandes deliberadamente a pasa dilanti pa bira e lider di e diskushonnan global di reparashon, promé ku su otro kompañeronan gobièrnu kolonisadó, manera Inglatera i Fransia etc., ora ku e Promé Minister Rutte a pidi despensa, siguí pa Rei Willem di Hulanda. E intenshon tabata pa tuma over e kontròl i inisiativa di e movementu di reparashon for di Karibe liber i independiente, pero nan a move demasiado rápido sin kalkulá e reperkushonnan. Awor ta parse manera un bèrgwensa mundial pa nan mes. E Hulandesnan a plania pa sekuestrá i suavisá e movementu di reparashon, pero a frakasá dramátikamente e dianan ku a pasa akí.
Riba dianan promé i dos di òktober, na Simpson Bay Resort, na Sint Maarten, Bonaire Human Rights Organization tabata testigu kon e gobièrnu Hulandes enkabesá pa e sektretario di estado van Huffelen a invitá un grupo spesialmente selektá di lidernan di organisashonnan no-gubernamental, di e restante islanan Karibense kolonisá i subordiná. A agrupá e representantenan akí di Kòrsou, Aruba, Boneiru, Sint Maarten, Statia i Saba huntu pa skucha kon lo repartí i distribuí e $200 mion ku Hulanda a primintí.
E gruponan a keda asombrá ku durante e presentashon di gobiernu Hulandes, despues di estadia luhoso na e resort di 5 strea i sena i show e anochi promé, a wak kon e famoso limosna di $200 mion a keda redusí na mitar, esta na $100 mion. Anto despues e $100 mion lo keda dividí den partinan igual entre e anterior Antia (Kòrsou, Aruba, Boneiru, Sint Eustatius, Saba i Sint Maarten) risibiendo 1/3, Hulanda 1/3 i Surinam 1/3 parti. Bo por a tende un feneta kai den e sala, tur hende a keda paralisá pasobra e ora ei nan a komprondé kon e $200 mion a para bira $33 mion, loke ta masomenos $5 mion pa kada isla di e anterior Antia i posiblemente menos pa e islanan mas chikí.
Hulanda ku a duna e komunidat global speransa i gran espektativa, ora ku e Promé Minister Hulandes i Rei Hulandes a ofresé nan humilde diskulpa, pero loke mundu no a realisá e momentu ei ta ku Hulanda no tabata tin intenshon di duna reparashon na tur su kolonianan di pasado i presente.
