No ta pornada Hesus y splica e disipelnan e parabola den Mateo 13 tocante e maishi y e yerba shimaron. Mateo 13: 37 Hesus ta bisa: Esun cu ta sembra e bon simia ta e Yiu di hende, y e cunuco ta e mundo, e bon simia ta e yuinan di reino,y e yerba shimaron ta e yuinan di e malbado, y e enemigo cu a sembra nan ta e diabel, y e cosecha ta e fin di mundo, y e cosechadornan ta e angelnan.
Tur esnan cu tin wowo habri bo wowo y sabi dicon maldad y inmoralidad ta aumenta dia tras dia, pa motibo di e simia di maldad cu a wordo sembra door di diabel den e mundo aki, y cu hopi ta cay den dje, y no kier arepenti y entrega nan bida na Cristo Hesus, pa bira un yiu di e reino di Dios.
Pero tene cuenta tambe cu e maishi y e yerba shimaron ta crece hunto, pasobra Hesus mes a bisa cu e enemigo a sembra den e cunuco, y e a bay. ( Mateo 13:25).
Pesey e palabra di Dios ta bisa cu na nan fruta bo ta reconoce nan,( Mateo 7:15-20) ora hende conoce e berdad di Dios , y e ta haci tur locual ta posibel pa bay contra e boluntad di Dios door di , apoya maldad y complace cu diabel sea pa su propio ego, placa, poder of posicion e ta demostra di ta shimaron. Ora hende ta core pa responsabilidad, ta un señal tambe di shimaron , pasobra e enemigo a sembra y a cohe su caminda bay, Dios tene misericordia, ta tempo pa nos habri wowo.
Tene cuenta cu locual tin para scirbi den Daniel capitulo10:12: No tene miedo, pasobra for di e prome dia cu bo a pone bo curason,pa comporonde esaki y humiya bo mes dilanti di bo Dios, bo palabra nan a wordo tendi, y mi a bin como contesta riba bo palabranan. Ma e prins di e reino di Persia tabata strobami 21 dia largo.Y mira Miguel un di e prensanan principal a bin yudami.
Aki nan nos tur mester cuminsa compronde cu maldad tey y forsanan di scuridad tey pa stroba nos oracionnan y cu nos mester perservera den oracion, Nos mester haci oracion constantemente.
Ora Hesus a wordo batisa den Jordan, pa Juan Bautista , cielo a habri y e a mira Spirito di Dios baha manera un paloma,y keda riba dj’E. Y ata , un bos for di cielo, bisando esaki ta Mi Yui stima den Kende Mi tin goso.( Mateo 3;16).
E tentado a bin y a bise si Bo ta e yiu di Dios, ordena e piedra nan pa nan bira pan.Ma Hesus a contesta y bisa cu hende no ta biba di pan so ma di tur palabra cu sali for di boca di Dios.
Aki nan nos tin un prueba mas cu e enemigo no ta kier respeta y hasta e a purba di planta su mal simia den Hesus, door di presenta cu duda.
Pa culmina Pablo ta bolbe scirbi den 2 Timoteo 3:1-9 bisando asina aki: Ma sabi esaki, cu den e ultimo dianan temponan trabahoso lo bini. Y esey ta locual nos ta mirando, hende a perde respet pa Dios y su palabra, hende a bira odiado di di locual ta bon.
Hende cu tin apariencia cu nan conoce Dios, ma cu ta ninga e berdad di Dios den nan bida.