Den luna di september i october Conseho Insular di Boneiro den diferente reunion publico ta trata e concepto di presupuesto di Entidad Publico Boneiro pa aña 2024 i alabes e perspectiva pa e proximo tres añanan. Siman pasa durante e reunion di comision di Comunidad i Cuido a trata cierto partinan for di e presupuesto cu tin di haber cu entre otro enseñansa, cultura, deporte, trabou social i siguridad social.
E miembronan di e comision a pone principalmente hopi enfasis riba (falta di) maneho. Nan tabata di opinion cu Colegio Ehecutivo no ta indica suficientemente cua maneho ta forma base di e sumanan menciona. Tampoco nan no a manda e documentonan concerni pa Conseho Insular. E siman akí e debate a sigui durante un reunion di comision fiho di Planificacion i Desaroyo, caminda Colegio Ehecutivo a duna splicacion na Conseho Insular tocante e topiconan den e presupuesto cu tin di haber cu entre otro cambio di clima, maneho di tereno, facilidadnan di bebiendo, trafico i infrastructura. Ora ku tur comision caba trata e presupuesto, ta na Colegio Ehecutivo pa eventualmente haci adaptacion, di manera cu seguidamente por trat’é den un reunion di Conseho Insular di forma opinion.
Stipulacion di presupuesto
Un presupuesto ta un balotacion anual cu Entidad Publico Boneiro ta haci di su entradanan i gastonan pa e proximo aña. Legalmente Conseho Insular como esun cu ta responsabel pa e presupuesto tin ku stipula e presupuesto, di manera cu Colegio Ehecutivo por entrega esaki na ministerio di Asuntonan Interno i Relacionnan den Reino pa aprobacion prome cu 15 di november.
E stipulacion ta tuma luga den un reunion di Conseho Insular di toma di decision, caminda e miembronan di Conseho Insular durante un rondo di votacion por expresa nan aprobacion tocante e presupuesto definitivo of no. Solamente despues di stipulacion di e presupuesto por haci uzo di e ‘budget’-nan conforme e presupuesto aki.
