Un siman hopi fructifero ta tras di lomba na unda cu na New York a tuma luga e reunionnan di Asamblea General di Nacionnan Uni #UNGA78. Diferente Lider di diferente pais a reuni pa entre otro hunto mira con pa mehora nos mundo. E Metanan di Desaroyo Sostenibel, (SDG’s) tawata punto central rond di cua e diferente reunionnan a tuma luga.
Prome Minister Evelyn Wever-Croes durante Conferencia di Prensa di Gobierno di Aruba dialuna mainta, a elabora mas di su participacion durante e 3 dianan na Nacionnan Uni na unda el a atende 28 diferente conferencia bilateral, high level events, y reunionnan riba diferente topico, manera derecho humano y topiconan pa empodera hende muhe, adaptacion di clima y infrastructura, energia y pobresa. Tambe Prome Minister hunto cu Premier di Hulanda Mark Rutte y Premier di Sint Maarten Silveira Jacobs, a reuni cu Secretario General di Nacionnan Uni, señor Antonio Guterres.
Prome Minister a remarca cu ainda durante e reunion aki, Aruba ta hayando hopi elogio pa a guia e Conferencia di Awa cu a tuma luga na Aruba na luna di maart ultimo. Esaki tawata un evento cu Hulanda a organisa y Aruba tawata e anfitrion y Prome Minister tawata tin e honor pa lidera esaki. Di parti di Aruba, durante e reunion cu señor Guterres, Prome Minister a elabora riba e necesidadnan cu, como isla chikito, Aruba tin. Paisnan SIDS, Small Islands Development States, tin varios necesidad compara cu paisnan grandi. Prome Minister a pidi atencion pa e debenan grandi debi na e pandemia Covid cu nos paisnan SIDS tin, incluyendo Aruba.
Secretario General di Nacionnan Uni ta un promotor di e Proyecto Swap Debt To Grant. Esaki ta encera cu paisnan cu tin debenan di pandemia, haya un tipo di dispensacion y por uza e placa pa inverti pa haci e pais mas resiliente. Esaki, Prome Minister a enfatisa, ta un proyecto cu Gobierno di Aruba semper ta sostene. Prome Minister a haci peticion pa sigui pone atencion y enfasis riba esaki. Secretario General Guterres a informa e Premiernan di Reino cu recientemente, Portugal a implementa esaki na Cabo Verde y esaki e Prome Minister di Cabo Verde a remarca tambe den un otro encuentro. Prome Minister, den nomber di Gobierno di Aruba, Hunto cu Nacionnan Uni a compromete pa sigui traha riba esaki pa Aruba tambe.
