Den e dianan nos dilanti entre 23 di September y 30 di September automobilistanan por tuma nota di luznan color cora riba e monumento di Bestuurs kantoor, na retonde dilanti di WEB y tambe na e toren di Aeropuerto Internacional Reina Beatrix.
E luznan cora aki ta den conexion cu e Siman Mundial di Curazon. E meta di e luznan cora ta pa yama atencion di tur hende riba malezanan di curazon cu por perhudica nos salud. Combati e malezanan cardio vascular sigur ta importante pa cada curazon cu ta bati. Conscientizacion ta un parti hopi importante den cuadro di e plan nacional di prevencion di malesanan NCD’s.
Un di e causanan cu mas ta afecta nos curazon ta presion halto, esaki por wordo combati door di hiba un bida mas saludabel. Presion halto ta afecta mas cu 30% di adultonan rond mundo, cu ta encera mas cu 1 biyon persona. E ta e factor di riesgo principal di maleza di curazon (cardiovascular, specialmente maleza coronario y stroke (atake cerebral), pero tambe maleza di riñon cronico, problema di curazon, aritmia y demencia. Esaki ta e razon cu Minister Dangui ta urgi comunidad pa sigui haci nan testnan di presion, haci bo chekeo mediconan regularmente pa preveni cualkier tipo di maleza.
Ministerio di Salud Publico su maneho ta basa riba prevencion. E siman aki ta pa reflexiona y pa promove un cambio den nos estilo di bida, pa hiba un bida mas saludabel y mas activo. Esaki por preveni malezanan cardiovascular, atake di curason of stroke.
