E actividad a keda organisa pa Ministerio di Enseñansa, Siensia, Kultura i Deporte/Sektor di Cultura i Deporte (ESKD) den cooperacion cu Fundacion Museo Tula (FMT). Na yegada cada bishitante a haña un banderita cu mensahe di un di e tres principionan di Tula i tabata tin animacion musical di sr. Anthony Hooi. E programa oficial a keda guia pa e maestro di ceremonia sra. Sigviana Francisca.
A cuminsa e actividad caminda a tene ceremonia di saludo na nos avochinan guia pa sr. Richinel Ansano i sra. Rose Marie Sling. Despues a sigui cu e programa oficial, caminda e hoben Nedeon Sluis a canta himno sigui pa discurso di presidente di FMT sr. Shurby Alberto. Na mes momento FMT a haci entrega di rapport relaciona cu historia di Corsou na sra. Nathania Engelhart, sra. Ilka Willems i na Minister sr. Sithree van Heydoorn.
Minister encarga cu Cultura sr. Sithree van Heydoorn a tene su diskurso i declara Siman di Cultura habri di forma oficial. E jingle di Siman di Cultura a keda presenta pa Dibo Di i Adjatai. Despues a sigui cu apertura di Marshe creativo, caminda empresarionan i boluntarionan a presenta nan productonan creativo. Tambe a haci desvela di e monumento: ‘Nos no ke nada mas sino nos Libertad”.
Despues a sigui cu presentacion titula: “Tula Rebelde inmortal”, di e orador di orden sra. Susanne Camelia-Römer, sigui pa reflexion di Profesor sra. Rose Marie Allen, sr. Max Elstak, sra. Jeanira Marshal i sr. Christoffer Rosinda. Tambe durante di e dia a tene varios actividad manera Maramento di lenso, Liderazgo, Story teller den hofi, Baile, Fashion Show Afrikano i paseo den e area di Kenepa.
Organisacionnan Kreadansa, Dushi Corsou, Caha di òrgel La Primavera di Rudsel Aniseto i Grupo Baba Awokosé a entrené e publico cu baile i musica durante di e ceremonia oficial i durante di henter e dia.
