Durante fin di siman a tuma luga Expo Salud 2023 unda cu diferente profesional den e mundo di cuido a ceracabes pa hunto duna comunidad di Aruba informacion tocante varios topico interesante y esencial pa cuido di salud. Claro cu e team di Horacio Oduber Hospital (HOH) tambe tabat’ey pa forma parti di e tremendo organisacion di e expo salud 2023.
Como un di e stakeholders di mas grandi y importante den e area di cuido medico na Aruba, sr. Gregory Croeze, miembro di hunta di directiva di HOH, a expresa cu “Hospital semper t’ey pa comunidad y pues awe ta akinan pa duna informacion na tur cu bishita expo salud. HOH su team di camber di operacion tabata presente pa splica e bishitantenan kico ta importante pa nan sa na momento cu nan tin cu bay haci un operacion. Tambe tabat’ey presente e team di Bloedbank pa recluta mas donante y e team di LABHOH cu a duna informacion riba tur e tipo
di testnan cu ta haci.” Sr. Croeze a expresa di ta hopi contento cu e tipo di actividadnan asina pasobra e ta un manera di trece tur e stakeholders hunto pa un solo meta.
Croeze a expresa palabra di gratitud na e team completo cu di HOH cu a duna informacion na expo salud. “Y kier corda tur hende cu nos semper t’ey pa duna informacion y educa e pashentnan y comunidad riba kico tur por spera na HOH pero tambe e servicionan cu ta
ofrece,” Croeze a termina. Josephine Willems, Medewerker Bloedbank, a comenta cu e meta di di Bloedbank na expo salud ta pa haya mas donante. “Tene na cuenta cu un donacion por salba tres bida, Willems a enfatisa. Nos falta hopi mas donante di sanger pa por cubri nos isla y e cantidad di habitante cu tin na Aruba”, Willems a conta. Un gesto bunita cu no ta
costa nada y ta pa salba bida di un otro. Pues, subi www.bloedbankaruba.aw y registra di biaha pa bo tambe bira donante di sanger.
Zoyenka Figaroa, Analist na LABHOH, a splica cu “LABHOH a informa tur bishitante tocante e testnan cu ta haci na laboratorio, pero specialmente e parti di patologia. Y tur cu a pasa cerca nos a haya e oportunidad pa mira muestra di un paptest bou di e microscop, por ehempel por mira con e celnan ta mustra”. Tambe di biaha a conta bishitantenan cu si no por yega LABHOH por haci uzo di e servicio di prik na cas tambe y tur informacion aki por haya riba www.labhoh.org.
Camber di Operacion tambe tabat’ey presente unda a duna informacion di loke bo tin cu haci prome cu bo opera, pues pakico bo tin cu ta na yuna y mucho mas. A trece diferente instrumento di camber di operacion y a tambe nos profesionalnan a duna demonstracion con ta intuba un pashent. Hopi pregunta a ser haci cu e meta principal pa purba di kita e miedo cu por tin y alabes garantisa cu e operacion lo cana bon,” Nina Brito- Kelly cu ta assistent manager di camber di operacion a termina bisando. Hospital ta contento di a forma parti di e Expo Salud 2023 cu tabata un exito sigur y kier manda palabra di pabien pa henter e team cu a traha duro pa haci esaki posibel.
