Aruba a inicia e trayecto di reduccion di debe. Como cu awor ta traha cu presupuestonan cu surplus, Pais Aruba na aña 2031 y 2040 lo cumpli cu e normanan di quota di debe stipula. Esaki ta promove e stabilidad di finanzas di Gobierno den momentonan dificil den futuro y pa por crea fondo pa inverti den areanan strategico, manera haci Aruba resistente na cambio di clima.
Entrada y gastonan den e presupuesto di aña 2024 ta proyecta un surplus di +1.0%, cu ta suma Afl. 69.7 miyon. Saldo di Presupuesto Aproba 2023 : Afl. +63.2 miyon. Efecto di proyeccion economico y intensificacion di maneho riba entradanan : Afl. + 74.4 miyon menos Efecto di intensificacion di maneho riba gastonan : Afl. + 67.9 miyon Saldo di Concepto di Presupuesto 2024 : Afl. + 69.7 miyon entrada.
E entrada di Pais Aruba lo subi cu mas o menos Afl. 74 miyon debi na crecemento economico y intensificacion di maneho compara cu aña 2023. E gastonan di Pais Aruba pa aña 2024 lo subi cu mas o menos Afl. 68 miyon debi na implementacion di programanan di Landspakket, iniciativanan di maneho y e crecemento di e gastonan di interes, entre otro pa paga e interes riba e debe di Afl. 916 miyon florin cu Hulanda.
Saldo financiero: E decisionnan tuma riba nivel di entrada y gastonan a hiba na un presupuesto cu un saldo financiero di un surplus di Afl. 70 miyon florin. Perspectiva pa futuro ta cu e surplus den Presupuesto 2024 lo ser destina completo na reduccion di debe di Pais Aruba. Esaki lo tin como resultado cu e debe lo conoce un reduccion di 5% di PIB compara cu aña 2023.
Den aña 2024 e posicion di debe di Aruba lo mehora cu 45.1 punto di porcentahe compara cu e posicion di debe durante e periodo di COVID19. Si no tin cambionan grandi por yega bek na e nivel di debe prome cu pandemia, na aña 2026.
E posicion di debe di Pais Aruba calcula pa cada persona na Aruba prome cu pandemia tabata Afl. 39,531 florin y después di pandemia esaki a aumenta na Afl. 52,305 florin.
A largo plazo, Aruba lo sigui cumpli cu e norma di surplus tanten cu no desvia for di e marco financieroeconomico valido. Pa e proximo cuatro añanan, ta premira cu e resultado di e norma colectivo lo surpasa e norma di 1% di PIB, debi na e bon prestacion premira di e fondonan social.
