Fransua Colina tabata un ilegal na Aruba, el a drenta Aruba for di lancha y a traha y haci diferente curso na Aruba, bao di e capa di Migrante cu Amor y Lucha na HIAS, despues cu el a logra di por duna su mes e enseñanza cu e tabata desea pa por sigui bay padilanti, el a produci un receta di su mayor cu a nace na Aruba cu yama Pika Caribe y awe e ta produci esaki na Merca. Por bisa cu awe Fransua Colina ta un migrante di amor y lucha y cu e tin su propio marca di pica.
Banda di cu a logra esaki Fransua semper tin Aruba den su curazon y e ta gradici na Aruba cu e por a logra haci e enseñanza cu awe a hibe unda e ta. Aunke cu e no ta na Aruba, tur caminda cu e bay e ta promociona su pica y Aruba. Diasabra ultimo na Florida hunto cu su team, nan tabata na POP market Orange Park Mall na Jacksonville cu e bandera di Aruba promocionando su producto y na mes momento contando su historia y kico tur Aruba ta significa pe y e oportunidad cu Aruba a dune aunke cu el a drenta e isla ilegalmente. Fransua ta duna di conoce cu berdad el a drenta ilegal, pero cu bon intencion pa progresa y no cu mal intencion pa haci daño of tuma mal caminda. Awe por mira e fruto di esaki. E lo sigui traha pa bay padilanti y ta kere cu un dia su pica lo ta rond mundo cosechando exito. Di e manera aki Fransua Colina ta duna danki na Aruba y ta spera cu un dia lo por bolbe Aruba bek pa vakansi y recorda y disfruta di e isla un biaha mas.
