Manera nos lectornan sa, nos relato ta un ves pa siman y nos temanan ta varia . Tin biaha nos actividadnan cu ta tumando of a tuma lugar ta yega na beurt. Nos ta purba di bay segun e secuencia di local a tuma lugar, pero tin biaha sa pasa algo otro cu ta hanja prioridad.
Manera nos a sinja anjanan atras fei Don Carlos “Cayochi”Kelkboom di Radio Kelkboom, tin noticianan cu ta dura un dia y tin noticianan cu ta dura mas largo. E siman aki, nos lo trata e tema di un curso cu workshops masha interesante mes, cu a tuma lugar no mucho tempo pasa bau di e dinamico liderazco di e simpatico Rebecca Roos, un profeshonal den grabacion y filmacion. Un grupo hopi enthousiasma di mas o menos 12 persona, algun conosi den nos comunidad pa nan trabaonan cu nan ta eherce, entre nan e musico Ivan Quandus, e conosido cabayero Roly St. Jago , e gentil cabayero Lucacio di Unoca y Dr. Joyce Perreira di e.o. Fundacion Lanta Papiamento, kendenan a forma parti di esnan participando na e tremendo curso di traha Documentario of documental cortiko cu tur e aspectonan.
E tawata un curso hopi pero hopi intenso cu a dura dos siman largo di mainta te atardi casi non stop sin mucho pausa. Nan tur a traha masha duro mes riba e partinan tecnico, theoretico y practico , busca tur sorto di informacion relaciona cu e temanan scogi. E anochi di entregamento di certificado a tuma lugar den e museo Cas Dun dun Ecury y e publico presente, amantenan di arte y mas, por a presencia y mira e resultadonan graba den nan Short Documentary. Tur e temanan tawata temanan importante den nos comunidad.
Un team a filma con a yega na e bordjie cu e nombernan di cayanan den Oranjestad y pakico tal y tal nomber, nos por a tende e stem di Sr. Gregorio “”Ito Tromp” den entrevista. Ito ta un shon di hende cu hopi sabiduria. Un team a filma con Piscamento a cuminsa y of con e ta desaroyando y su importancia den bida di un piscado , y un team a filma comienzo y consecuencianan di droga, ora un persona ta bira adicto na droga den nan grabacion” Dunami un florin”. Segun mi cada documentario of documental a dura menos di 5 minuut. Figurabo, tanto informacion interesante importante y balioso den asina tiki tempo.
E filmacionnan tawata tremendo, casi ningun fayo tecnico chikito, pero , imaginabo e presion riba cada un di e participantenan pa keda cla cu nan ‘’opdrachtennan”’ den e tempo duna y permiti. Publico presente por a lanza cualquier pregunta den direccion di e tres teamnan, cu a luci y briya tremendamente den nan trabao. Un trabao cu Rebecca Roos a duna di su amor y pasion na otronan , sinjanan traha y hinka un documentario cortiko den otro.Tawata un anochi impactante y hopi agradabel cu dushi ambiente. Despues di tur e presentacionan, publico presente por a disfruta di un dushi binja of refresco y of un dushi subway sandwich. Hopi pabien na cada un di e participantenan na e curso aki di Short Documentary cu awor sa mas den e area aki tambe. Aruba tambe tin su dushi hendenan professional y bon capacita, hopi talentoso manera Rebecca Roos, cu tin varios bunita y interesante filmacionnan ariba su nomber. ,
Pabien un biaha mas na tur cu a participa na e curso aki y danki na Rebecca Roos y tur cu a hasi esaki posibel. Danki na tur esnan cu a permiti di wordo filma y of entrevista den e documentarionan cortiko aki. Danki pa lesa nos relato cu atencion. Un “bearhug”pa bosonan tur. !
