Awendia tin hopi confusion, y hende ta puntra kico ta di Dios, y kico no ta di Dios, pasobra tin hende ta usa e palabra di Dios ora ta cumbini nan, djis pa show, pero nan no tin respet pa Dios, y e cos ey ta hopi peligroso pasobra Dios lo saca tur cos na claridad, pa demostra kico ta di Dios y kico no ta di Dios.
Dios no ta un Dios di confusion, sino di paz. ( 1 Corintionan 14:33). Pasobra tur esnan cu ta wordo guia door di e Spirito di Dios, esaki nan ta e yuinan di Dios.(Romanonan 8:14)
Ora nos arepenti, acepta y kere den Cristo Hesus nos ta ricibi e Spirito di Dios, cual ta e Spirito Santo. Pasobra si un hende no tin e Spirito di Cristo e no ta pertenece na dj’E. ( Romanonan 8:9). Den esaki nos ta compronde awor cu hende por haci cosnan den carni y hende por haci cosnan spiritual, y con nos lo nota e diferencia?
Un di e maneranan mas cla cu por señala cu nos tin e Spirito Santo di Dios, ta na e frutanan cu ta sali for di nos. Y e frutanan di Spirito Santo ta: Amor, Gozo, Paz, Pasenshi, Cariño, Bondad, Fieldad, Genetileza, Dominio Propio, contra e cosnan aki no tin ley.
Cada dia den nos bida esakinan mester wordo demostra, pa asina tambe hende por mira den nos ken nos ta sirbi y cual spirito ta dirigi nos bida. Pero e deseonan di carni ta contra e Spirito di Dios y nan ta conoci pa tur hende y nan tambe ta duna evidencia di nan existencia cualnan ta:
Inmoralidad, Impureza, Sensualidad, Idolatria, Bruheria, Hostilidad, Bringamento, Jaloersheid, Rabiamento, Pleitamento, Desacuerdo, Doctrina falso. Envidia, Buracheria, Parandiamento,y cosnan asina aki, di cual mi ta spierta boso di antemano, mescos cu mi a spierta boso di antemano, cu esnan cu ta practica, sorto di cosnan asina lo no hereda e reino di Dios.( Galationan 5:19-21.
Awor ta conoci cu hende kier cana den dos caya, y biba dos bida, pero locual bo ta alimenta mas esey ta domina bo bida, si bo ta alimenta e Spirito di Dios, cu bo Oracion , Ayuno, lesamento di Bijbel, bishita cas di Dios, y aparta for di pica, e Spirito di Dios y su frutanan lo manifesta den bo bida.
Pero si bo ta alimenta e carni, cu su inmoralidad, inhusticia, rabia, odio, amargura, envidia y arogancia e spirito di mundo y tur su bagamunderianan lo ta visibel den bo bida. Pasobra e Palabra di Dios ta bisa nos claramente:No gaña boso mes, Dios no ta laga hende haci bofon di dj’E, pasobra loke un hende sembra,esaki tambe e lo cosecha. Pasobra esun cu sembra pa su mes carni, lo cosecha corupcion for di e carni, ma esun cu sembra pa e Spirito, lo cosecha bida eterna for di e Spirito.( Galationan 6:7-8).
Hende por tuma nota den ki direccion nan ta bay y kico ta spera nan como cosecha. Palabra di Dios ta siña nos den Mateo 13:24-30 cu e maishi y e yerba shiramaron lo crece hunto y na final Señor lo manda su angelnan, y nan lo ranca e yerba shimaron, mare ta boshi pa kima nan y e maishi e lo warda den Su mangasina.
Ta tempo pa nos para keto un rato y wak bon den cual direccion nos ta hiba nos hogar y nos famia, tempo pa nos fiha nos bista riba Dios, y riba Dios solamente, pasobra inmoralidad ta aumenta dia padia, y hopi ta sigi cosnan di mundo, enbes di busca Dios.
