Den e reunion di tuma decision di dia 23 di augustus 2023, sin cu tabata tin un reunion di forma opinion of alomenos un reunion di comision prome, un seri di proposicion a subi agenda pa modifica e reglamento di ordo di conseho insular i comisionnan fiho.
A presenta un resolucion pa cu instruccion i mandato na e grifir cu ta desvia signifikantemente for loke ta custumber na Hulanda i Caribe Hulandes. A entrega un proyecto di ordenansa pa loke ta trata establecimento di un comision permanente di prodesimiento cu tambe ta diferencia signifikantemente di loke ta normal na Hulanda i Caribe Hulandes. Tambe a pone un proyecto di ordenansa pa loke ta trata encuesta, un proposicion pa aproba un nota di conseho insular pa loke ta trata maneho hunto cu documento i formularionan athuntu den cual ta scondi seis decision cu conseho insular mester aproba incluyendo e ordenansa pa loke ta trata informacion i toma di decision di conseho insular 2023.
Si esaki no tabata suficiente por a tuma nota cu e ultimo dos simannan cu a pasa un miembro di un partido den oposicion di conseho insular di Boneiro riba su mes a determina cu un diputado no a actua na un manera integro i a lansa un atake formal i personal contra e diputado sin ningun prueba tangibel. Sin ningun berguensa ela exigi tur documento pa loke ta trata e decision cu gobierno a yega na dje pa loke ta trata e compania cu ta na nomber di e casa di e diputado pa colmo i esaki mester sosode tambe dentro di un periodo cu ela stipula. E miembro sinembargo no ta compronde cu tin un codigo di conducta pa miembronan di conseho insular cu ta dicta hopi cla con mester actua ora ta sospecha ku un miembro di conseho insular, un diputado, gezaghebber of grifir a viola reglanan di integridad. Ta di spera i warda si elo actua cu mesun fervor pa loke ta trata un transaccion fracasa cu Fundacion Mariadal caminda un miembro di conseho insular ta e protagonista principal.
Si revisa e documentonan relaciona cu e reunion di tuma decision di conseho insular dia 23 di augustus ultimo, i pa cuminsa na e parti facil, por constata cu conseho insular kier figa un montante di no menos cu US$ 60.000 den un forma di sosten financiero fiho pa cada fraccion loke ta eksorbitantemente halto comporta cu munisipionan similar na Hulanda. Ta notabel cu miembronan di presidio, cu ta e lidernan di fraccion cada un lo haña un compensacion di US$ 195 pa luna. Ta custumber cu un conseho insular nunca no ta dicidi asuntonan financiero pa su mes pero semper pa e proximo conseho cu mester sinta despues di un eleccion. Tambe por observa cu conseho insular por nombra miembronan extra ordinario pa loke ta trata e comisionnan fiho pero ta lubida di codifica e hecho cu e miembronan extra ordinario aki mester tabata riba lista di e ultimo eleccion. Esaki ta pa e legitimacion di votadonan. Un hende cu tabata riba lista di eleccion pero no a bira miembro di conseho insular, facilmente ta keda identifica mara na e ideologia di e partido.
Henter e proceso con ela cana pa pone e topiconan riba agenda ta genera cierto sospecho i e pregunta ta si realmente a pidi colegio ehecutivo su opinion manera decencia i lei ta exigi. Sigur ta cu e ministerio di asuntonan interno i relacion di Reino a tuma nota di henter e asunto aki i a declara ku decisionnan di colegio ehecutivo i di gezaghebber no por depende di un acuerdo of huicio di conseho insular i conseho insular no por determina kico ta interes general of publico. Si e totalidad a sigui e ora ei mester bisa ku e dualismo i e democracia local efectivamente a keda rementa for di otro. Un situacion realmente espantoso.
Tumando e circunstancianan na cuenta mester bisa cu colegio ehecutivo, e gezaghebber interino i e gezaghebber anterior no por sali completamente liber di e asunto aki. Ta durante nan periodo a keda sin haci decisionnan di conseho ehecutivo publico pa asina conseho insular por a haci su trabou manera debe ser. Banda di esey ora cu gezaghebber, cu ta keda considera como protector di nos democracia local i integridad gubernamental, diripiente a tuma retiro, i yegada di algun miembro di conseho insular nobo i nobato despues di eleccion, a crea e posibilidad pa un atake frontal contra nos democracia local.
Conseho insular mester wordo pone bou di control atrobe. Pa cuminsa mester elimina tur e comisionnan fiho i bin cu un comision central pa mehora e transparencia di decision i e eficacia. E poder pa pone topiconan riba agenda mester keda kita for di presidio i duna e comision central e tarea. Actualmente e presidio tin e conseho insular secuestra i esaki no mester keda permiti. Den presidio ta sinta solamente lidernan di fraccion i cu dos miembro di oposicion i dos miembro di coalicion, esaki no ta refleha democracia real. Mas pronto cu ta posibel mester nombra un grifir permanente cu tin e habilidad pa trece trankilidad i e autoridad necesario. Mester nombra mas pronto posibel un gezaghebber nobo cu hunto cu grifir trece ordo atrobe den conseho insular. Miembronan di conseho insular mester concentra nan mes riba e tarea di crea cuadro, lei i regla i representa e pueblo i nan mester realisa nan mes cu nan no ta parlamentario cu empleo fultaim mara na un salario corespondiente. Por ultimo colegio ehecutivo mester compila un programa di gobernacion i entrega esaki na conseho insular pa debate i aprobacion. Si no tin un programa di gobernacion aproba anto lo no dura mucho cu atrobe lo tin un atentado contra di nos democracia. Considerando tur loke a pasa ta doloroso pa constata cu te ainda nos ta incapaz pa cuida i mantene nos democracia local.
Dr. Willem A. Cecilia
