Awe ta un dia hopi special na Aruba, for di Bogota, Colombia e arte publico cu a ser traha door di e artista Gilbert Senchi a keda cla y ta na Aruba. Manera sa caba, Gilbert Senchi a ricibi un tarea for di Gobierno di Aruba hunto cu sector comercial pa traha un driekiel grandi pa pone riba un rotonde na Eagle Beach. Apart di e driekiel, el a traha tambe un busto na memoria di e polis cu a fayece durante pleno ehecucion di su trabou esta, Tino Ruiz cu ya caba a ser inaugura.
Awe e arte a yega Aruba cu yudansa di instancianan ta sali for di waf di barcadera cu Fast Felivery Services un di e companianan capacita na Aruba cu por trece y maneha trabaonan asina grandi na Aruba ( Oversize Cargo). Awe cu dedicacion cu e profesionalnan di Fast Felivery Services e driekiel a keda transporta na e rotonde banda di Amsterdam Manor Beach Resort Aruba unda cu lo e ta un bunita atraccion turistico.
E arte lo ta riba e rotonde unda cu tur hende por pasa y atmire, pero mas tanto pa tur hende para keto un rato y sa y keda recorda e importancia di naturalesa pa cada un di nos como serhumano cuida esaki. Tambe pa e turista cu ta bishita nos isla admira e arte, pero na mes momento pa sa cu Aruba ta para keto y duna importancia pa cuida nos naturalesa.
A scoge e obra di arte aki paso e tin su historia, driekiel a kies Aruba pa miles di aña caba pa bini y pone su webonan na Aruba. Esaki ta significa hopi pa Aruba y mama naturalesa. Awe Aruba ta honra e fieldad cu driekielnan tin y e confiansa cu nan tin pa bin pa miles di aña pone nan webonan y pa nan yiunan nace aki na Aruba. Mas cu tur cos tambe ta trece conscientisacion pa nos keda proteha e animalnan aki.
