Dia 9 di September 2020 Parlamento di Aruba a pasa e ley di Ombudsman unanimamente. Despues di esaki a haci otro reunionnan pa asina por haci cambionan tocante e ley aki. E ley aki ta un ley cu MEP ta carga den su totalidad y ta mira e gran importancia pa esaki. Asina parlamentario Darlaine Guedez-Erasmus a indica
Ultimo cu a trata e ley tabata 23 januari 2023 cu e cambionan manera e nombramento y e ontslag di e Ombudsman y e Kinderombudsman y investigacion pa mucha y hoben.
E profielschets a keda finaliza na Mei 2023 y desde Diabierna 8 September 2023, e vacatura pa Aruba haya su prome Ombudsman a sali y por mir’e riba gobierno.aw. Lo por mira tur e rekisitonan riba e website y por manda un email na secretariaat@caribjustitia.org.
Tin e oportunidad te dia 29 September 2023 pa aplica. E Ombudsman su tarea primordial ta defende e interes di e ciudadano y supervisa e calidad di e servicionan publico den un pais. Cu otro palabra e Defensor di Pueblo lo yuda comunidad investigando nan keho y/of denuncia. Alavez e Defensor di Pueblo ta pa yuda e aparato gubernamental pa mehora nan procesonan y proceduranan basa riba e resultado di su investigacionnan y informacion adkeri. Pronto Aruba lo conoce su propio Ombudsman y ciudadanonan lo tin un luga special pa acudi pa haya oido pa nan preocupacion.