Diaranson, 20 di September 2023, Gabinete Wever-Croes II ta cumpli 2 aña den gobernacion. Prome Minister Evelyn Wever-Croes a expresa, cu e ultimo 2 añanan aki tabata di hopi reto, pero cu esfuerso, dedicacion y amor, a logra stabilisa e pashent “Aruba”, cu na comienso di gobernacion, ainda tabata den gara di e pandemia. Gabinete Wever-Croes II no a logra solamente di stabilisa pais Aruba, sino awor e ta recuperando, y tur instancia local y internacional ta wak e recuperacion aki. Nos no ta ainda caminda cu nos mester ta, pero nos ta riba e bon caminda.
Prome Minister a indica cu e trabounan durante e ultimo 2 añanan no tabata facil. Tur 8 minister di e Gabinete aki a traha y ta trahando duro pa e recuperacion aki yega na cada ciudadano di pais Aruba, y den nan hogar. Danki na tur e trabounan duro di e ministernan, por nota awe, cu e situacion financiero ta bou control, y cu Aruba ta e unico pais den Reino cu ta mirando un surplus.
E gastonan di Gobierno ta bahando, y e entradanan ta subiendo, cual ta yuda pa por paga e compromisonan financiero cu e pais tin. E economia tambe ta creciendo, danki na e pilar economico mas grandi cu ta turismo. Mientras cu inflacion ta bahando. Gabinete Wever-Croes II tambe tin como meta pa duna mas atencion na calidad di enseñansa, y di cuido, y pa pais Aruba sigui desaroya den balanse cu e medio ambiente.
“Tur esakinan ta metanan cu Gabinete Wever-Croes II lo mantene y mehora den e siguiente aña di gobernacion. Logronan cu apesar di tur e retonan cu a bin den nos caminda, nos Gobierno ta hibando pais Aruba den e bon caminda. Mi ta sigur cu padilanti tambe nos lo encontra retonanan nobo na caminda, pero mirando e experiencia cu nos a gana e ultimo dos añanan aki, y e amor y dedicacion cu cada minister ta pone den nan trabou, mi ta sigur cu nos lo enfrenta nan cu balentia, y lo logra surpasa cada un di nan tambe. Mi ta orguyoso di e Gabinete aki y tur loke nos a logra pa nos dushi baranca. Mi ta gradici henter comunidad di Aruba pa nan sosten y nan confiansa”, Prome Minister a expresa.
