Bon manera ta habri porta, mal manera ta sera porta den nos bida. Bunitesa, ni tampoco bon tipo, of perfume no por sconde mal manera. Estudio y placa no por domina arogancia. Mal manera ta manera un flat tire e ta keda zona te ora e wordo drecha.
Bon manera ta pone hasta un mata smile. Tin un tendencia awendia di mal manera y griteria, cual ta identifica hende como un persona fuerte, pero ta un gran mentira, un persona asina ta bobo y ta serando porta pa su mes.
Despues di siña muchanan nan identidad den Cristo cu nan ta yiu di Dios, y socialmente cu nan ta homber of muher segun Dios a crea nan, nos ta bay over na e parti di sembra bon manera y respet den nan. Pasobra si nos no hacie como mayor caya ta educa nos yuinan, internet ta bruha nan cabes y despues nos como mayor ta man na cabes.
Muchanan ta embahador di cas, y si e embahadornan di cas tin mal manera, e cas ta saca mal olor den comunidad, pasobra nan ta identifica ki sorto di hende ta biba den e cas, pero si nan ta bon educa , cu bon manera, yen di respet y obedencia, tur mucha di bario lo ta nan amigo pasobra nan ta brinda positivismo, No ta facil lanta mucha den e tempo aki, pero tur esfuerso mester wordo haci, pasobra si un palo crece dobla, ora e bira grandi ta dificil pa stret e bek, ta ora e ta chiki nos mester sostene pa e por crece den bon direccion.
Nos trabao cu nos yuinan na cas ta fundeshi pa maestronan na scol , pasobra nan lo sigi traha riba locual nos a sembra na cas, ta mayor su deber di pone e prome piedra di educacion, pesey ora nos sembra orden, respet y disiplina for di cas, e muchanan lo score den conducta na scol.
Palabra di Dios ta siña nos den Filipensenan 2:5 : Laga tin den boso e actitud cu tabatin den Cristo Hesus, y nos tur sa cu e actitud di Cristo ta manso y humilde. ( Mateo 11;28-29).
No laga ningun palabra dañino sali for di boso boca, sino solamente palabra cu ta bon pa edificacion, conforme e necesidad di e momento, pa esaki por duna gracia na esnan cu ta tende.
Laga tur amagura, furia,rabia,griteria,y calumnia,wordo kita for di boso hunto cu tur malisia.Sea cariñoso cu otro,misericordioso, pordonando otro,mescos cu Dios den Cristo tambe a pordona boso.( Efesionan 4:29-32)
Haci tur cos sin murmura, ni discuti, pa boso por proba boso mes di ta sin culpa y inocente , yuinan di Dios sin reproche mey mey di un generacion corumpi y perverso, entre cual boso ta briya manera
lusnan den mundo.( Filipensenan 2:14-15). Asina manera esnan cu a wordo scogi di Dios,santo y stima,bisti un curason di compasion, cariño , humildad, mansedumbre y pasenshi. ( Colosensenan 3:12).
E hende misericordioso ta haci bon na su mes, ma e hende cruel ta tormenta su mes carni. ( Proverbionan 11:17). E enemigo ta cla para pa horta identidad di muchanan y tambe yena nan cu orguyo y arogancia, pa asina nan aparta for di e caminda di Dios, y biba den scuridad.
Pa biba den amistad cu e mundo cual ta hiba nan na enemistad cu Dios.( Santiago 4:4).
Den tur forma nos como mayor mester ta firme, para banda di nos yuinan, dunando testimonio di Dios su grandesa den nos bida, asina e muchanan por sa, cu den cualkier situacion cu nan por cay aden, Cristo Hesus ta e solucion. Sinceramente, Pastor Marcel Balootje.
