Awe politica ta demostra kende ta di generacion nobo y kende ta conoce e historia di Aruba y sa kico tabata e lucha cu Pais Aruba a pasa pa por logra y yega unda nos ta awe cu nos tin nos himno, bandera, nos escudo y nos mes un moneda y Banco Central.
Sigur politica ta un arte, pero banda di esaki e conocimento politico y historia di un Pais ta hopi importante pa sa di unda nos a bin y unda nos ta bay. Awe por mira despues di cu Aruba a haya un LAFT di gabinete Mike Eman pa su mal maneho, unda cu pueblo mes a dicidi pa baha e gobierno pa bin cu un cambio y pa structura e finansas publico, ni un aña cu pueblo mes a pidi pa cambia e gobierno di AVP, e pandemia a drenta Aruba. Tabata un pandemia cu no a causa un situacion leve, sino tabata un pandemia di grado asina halto cu a causa un shutdouwn di pais Aruba pa proteha su hendenan.
Pais Aruba cu no ta un pais cu tin su propio pilar economico di produccion, pero e unico pilar economico turismo cu a wordo afecta drasticamente pa e shutdown obligatorio. Esaki a causa cu cada un di nos aki na Aruba no por a haci netamente nada, sino haya yudansa di Hulanda cu ta esun cu tin cu cuida nos y a base di e statuto nos tin mester traha hunto y yuda otro na momentonan cu tin mester, manera den Pandemia.
Sinembargo esaki tabata e caso durante di pandemia unda cu decisionnan no popular mester a wordo tuma pa scapa Aruba su hendenan. No por a permiti insiguridad di e pais bira grandi y causa un caos. E decisionnan tuma tabata pa por tin placa tur luna pa hendenan por come y cuida nan salud durante di e pandemia di COVID cu a azota mundo. Esaki tabata e momentonan di mas dificil cu Aruba a confronta su mes bao di maneho di gabinete Evelyn Wever Croes, cu a haye ta tuma decisionnan fuerte pa salva su pueblo.
Si mester para keto un rato y evalua, si e decisionnan tuma no a wordo tuma, kico lo a sosode cu e pais aki? Kico lo a sosode cu cada un di nos si no tabatin cuminda riba mesa?
Aruba tin un status diferente cu Curaçao y St Maarten. Cada un di e islanan aki tabatin mester di ayudo di Hulanda y nan a haya esaki tambe. Consecuentemente e status di cada pais den negociacion ta diferente y cada uno lo por atende e negociacionnan diferente. Den e caso di Aruba na momento cu ya caba prome cu e pandemia Aruba a haya un LAFT y un KB door causa pa gabinete Mike Eman, e confianza di Hulanda ya caba tabata tambalia e momento ey, Hulanda simplemente kier e siguridad di su placa y cu e maneho di e pais ta serio, cual no tabatin cu gobierno di AVP.
Por conclui cu den un corto tempo prome cu a alcanza pa por a drecha e finansas malo cu AVP a laga atras, e COVID a yega unda cu Hulanda mester a yuda Aruba, pero debi na e mal maneho di AVP y desconfiansa cu ya caba tabata tey, Hulanda a pone un presion enorme riba pais Aruba. Ken ta esun cu a haya e presion aki ta e gobierno di MEP, aunke esnan cu a haci e daño grandi tabata gabinete di Mike Eman.
Asina aki a introduci COHO pa e islanan unda cu cada COHO tabata diferente, pero esun di Aruba Hulanda tabata kier practicamente kita e autonomia di Aruba. Esaki no a bay facil y esaki no a logra tampoco mirando cu parlamento di Aruba no a acepta esaki. Asina a cuminsa cu negociacionnan y a cambia e COHO pa un onderlinge regeling na momento cu a pone Hulanda para straight cu Aruba tin su parlamento y su leynan y mester respeta esaki. Asina aki a haya e onderlinge regeling y cu e negociacionnan a sigui y cu parlamento a keda cu su autoridad pa tuma su propio decisionnan na Aruba.
Sinembargo e negociacionnan no a caba aki. E supervision financiero autoriza pa e Landsverordening Aruba tijdelijk financieel toezicht (LAft) a keda riba mesa y awe tin un Rijkswet Aruba financieel toezicht (RAft) cu ta riba mesa te na e momentonan aki ainda.
Sinembargo tanto Hulanda y Aruba ta na mesa pa por yega na miho dealnan con pa por bay paga e debe bek cu a presta durante di COVID, un debe cu no tabata necesario pa haci si e pandemia no a presenta. Aunke cu statuto ta bisa cu Hulanda y Aruba mester yuda otro den momentonan dificil, esaki no ta e caso na e momentonan aki cu Hulanda y Aruba.
Aruba no ta baha cabez y pidi pa yudansa, pero lo kier paga su debenan na manera husto si. Sinembargo Hulanda na su turno si e tabata un bon mama lo e mester a yuda Aruba den e momentonan dificil, manera e statuto ta bisa, pero Hulanda a demostra su cara cu Aruba y no ta haci esaki, pero ta dispuesto pa duna un refinanciamento na Aruba entre 3 pa 6 % cu ta dobel di loke nan ta haya e placa fia pa por fia Aruba. Esaki ta un situacion cu tin Aruba disgusta y na unda cu ta inhusto cu Hulanda kier bin haci ganashi riba cabez di Aruba y hinca Aruba den diferente skina y posicionnan pa tuma esaki, pero Aruba a vota pa un prome Minister cu sa di para pa su pueblo y esaki netamente e ta haciendo pa por yega na un solucion husto pa Aruba por paga y sin haya e yudansa gratis manera e lo tabata supose di ta, segun nos statuto cu ta bisa cu den momentonan dificil e paisnan lo mester yuda otro y no trata di horca otro, cual ta loke cu Hulanda ta haciendo actualmente cu Aruba.
E lucha di Prome Minister ta sigui na mesa y Hulanda a mira cu aki no por keda forza y a duna espacio pa negosha, pero na e mes un momento a changa Aruba cu 30 miyon extra, cual cu supuestamente Hulanda lo tabata e mama cu lo mester por yuda Aruba den momentonan dificil. Esaki ta e scenarionan di e abuso di poder cu Hulanda ta eherciendo riba Aruba.
Banda di esaki por tuma nota cu politiconan sea tin algun cu rabia personal y no ta worry pa perhudica Aruba, otro cu djis ta grita cu stem halto cu kier ta orguyoso, pero no tin vision. Otro cu ta bon studia y kizas e historia di loke Aruba a pasa aden no ta di su interes, y otro politico cu tin un pensamento contradictorio na loke ta statuto y posicion di Aruba den Reino. Ta di lamenta cu politiconan asina ta den politica.
Pero si mester mira e politiconan real cu tin conocemento amplio di historia di Aruba y nan antepasadonan a lucha pa awe nos tur por goza di e Aruba cu nos tin, ta para hunto pa lucha contra di RAFT, aunke cu politicamente nan no ta amigo, pero e pensamento ta riba e mes un liña, cual ta MEP, AVP y ex minister Otmar Oduber.