Recientemente Oficina di Turismo di Corsou (CTB) hunto cu Diamond PR a organisa un ‘mega’ trip unico pa 30 influencers riba TikTok procedente di Estados Unidos y Canada bin cera conoci cu Corsou.
Meta di e trip tabata pa aumenta e conocemento di nos destinacion bou di nos mercadonan di enfoke y asina alcansa un grupo grandi di futuro bishitante. E grupo di TikTokers a keda di 12 pa 15 di september y a explora, descubri y experencia e producto turistico unico cu Corsou ta ofrece. Nan ta comparti nan experencianan riba nos isla via videonan atractivo cu ta alcansa un audiencia combina di riba 40 miyon siguido. Ta trata di TikTokers cu ta crea contenido rondo di topiconan manera, biahe, gastronomia, buceo, bailamento, moda, LGBTQ, entretenimento, deporte y wellness.
E programa a inicia cu un Mini Carnaval caminda e grupo di TikTokers a keda compaña pa un brassband y algun persona den nan trahe di Carnaval saliendo for di Wilhelmina Park pasando riba Emmabrug y termina den Cura Hulanda Village. Su siguiente dia, e grupo a participa na un Willemstad tour riba scooter pa admira entre otro e muralnan colorido y pa nan almuerso nan a bishita Plasa Bieu. Tambe nan a bishita Parke Nacional Shete Boka, Kenepa Grandi, core riba jetski y landa na Cas Abou. Mas aleu, nan a participa na entre otro un workshop culinario, un tour riba buggy pa explora parti Oost di Corsou y un workshop na Hofi Mango pa siña traha nan propio te di yerba. E bishita na Corsou a forma parti di un proyecto total coordina pa e agencia Diamond PR bou di e nomber TikTok Island Hop, caminda e TikTokers a bishita tanto Boneiro como Corsou.
Ta bon pa menciona, cu TikTok ta e plataforma di medionan social cu a conoce e crecemento mas acelera, e ta disponibel den 160 pais, cu riba 1.1 biyon usuario activo y e plataforma a ser descarga mas di 220 miyon biaha na Merca. Gen Z (20% di e poblacion na Merca) ta uza TikTok como ‘search engine’ i no Google. Tambe e edad di e usuarionan ta subiendo, riba 50% ta riba 30 aña.
CTB ta contento cu e colaboracion cu Tourism Corporation Bonaire (TCB), Diamond PR y partnernan di turismo na Corsou pa asina por a mustra e diversidad di nos producto turistico na un grupo importante di TikTokers.
