Mientras nos ta cera un aña parlamentario mas, mi kier tuma un momento pa refleha riba nos rol como representantenan di e pueblo i e logronan i retonan importante cu nos a enfrenta durante ultimo aña.
Nos responsabilidad primordial como Miembronan di Parlamento ta pa ta e bos di e ciudadano, pa scucha nan preocupacion y pa accion den nan miho interes.
Durante e aña parlamentario aki, mi a haci e esfuerso pa cumpli cu e deber aki cu diligencia y dedicacion. Tabatin debatenan pica den Parlamento, mi a aproba legislacion importante i a tene e gobierno responsabel pa su actonan. Como miembro di e comunidad aki, mi a pone mi lomba y schouder pa yuda limpia nos entorno. Mi ta participa activamente hunto cu Cunucu Man, pa tene nos medio ambiente limpi. Pasobra, promove un ambiente limpi no ta solamente e trabou di nos gobierno òf Parlamento, pero di nos tur. Cu gestonan chikito, nos por crea un impacto grandi riba nos comunidad.
Hunto cu gruponan boluntario maraviyoso, nos a crea conscientisacion riba e tema di perdida di embaraso, Cancer di pecho i falta di vivienda. Como Parlamentario lo mi sigui haci mi esfuerso pa atende cu problemanan cu ta preocupa nos hendenan, manera cuido di salu, educacion, desaroyo social y medio ambiente. Mientras cu hopi a keda logra, mi ta realisa si, cu tin ainda hopi trabou pa haci. E retonan cu nos Pais ta enfrenta como nacion ta hopi y compleho, i ta nos deber pa sigui traha pa solucionnan duradero. Nos mester keda comprometi cu fomenta dialogonan habri i inclusivo, no importa diferencianan politico, pa topa otro riba tereno comun i pone cambio positivo na practica.
Awor cu nos ta drenta un aña Parlamentario nobo, cada bes atrobe nos mester keda enfoca riba e importancia di transparencia, responsabilidad i integridad den e rol como representantenan.
Nos mester keda corda cu nos ta encarga cu e poder pa tuma decisionnan cu tin impacto riba bida di nos hendenan. E responsabilidad aki ta exigi un nivel halto di conducta etico i un compromiso cu e principionan di democracia.
Un danki na cada uno pa comparti nan opinion, duda, conseho i sosten cu mi, mi ta aprecia Ban uni nos bos pa proteha i fomenta democracia!
