Ta trata aki di combustibel ekivalente na e norma di Euro 4
E grupo di trabou, cu ta conta cu representacion activo di Ministerio di Desaroyo Economico (MEO), MIinisterio di Salubridad Publico, Medio Ambiente y Naturalesa (GMN), Association Doñonan di Pomp di gasolin, Curoil cu ta e Proveedor Exclusivo di gasolin (Mogas 95) y Diesel ((U)LSD) na Corsou, Bureau Telecommunicatie & Post (BTP), Hunto cu Curaçao Heavy Equipment Association (CHEA), Sindicato Transporte Uni (STU) y Curaçao Car Dealers Association (CCDA), a entrega e guia di e calidad di combustibel den cua ta determina e specificacionnan nobo cu ta garantisa miho calidad di Gasolin (Mogas 95) y Diesel ((U)LSD), ekivalente na e asina yama: Euro 4, cu ta e norma cu ta wordo uza na Europa
Manera Kisas ya ta conoci, bou di guia di e Grupo di Trabou, SGS INSPIRE a haci un estudio di nos combustibel aki na Corsou. For di esaki a sali recomendacionnan concreto pa un miho calidad di combustibel, ekivalente na Euro 4, pa Corsou. Specificamente pa loke ta trata gasolin y diesel. Ta di remarca cu aki a tene debido cuenta cu e consecuencianan financiero – economico cu e recomendacionnan pa introduci combustibel di miho calidad lo trece cune. Consecuencianan financiero cu e miho calidad aki ta trece cone lo ta e.o. un subida leve di e prijs di gasolin y diesel di alrededor di 3 cen y 2 cen respectivamente compara cu e prijsnan vigente.
Minister Cijntje ta accentua y remarca cu banda di un calidad mas miho ekivalente cu Euro 4 di combustibel, e recomendacionnan aki ta nifica tambe mas y miho eficiencia y rendimento di e motornan di nos vehiculonan y tambe menos gasto na mantencion di esakinan.
Cu hopi orguyo, Minister Cijntje ta duna e primicia cu e recomendacion di specificacionnan nobo di gasolin y diesel a ser trata y acepta den Conseho di Ministernan diaranson 23 di augustus. Conforme planificacion, e prome ‘batch’ di e combustibel di miho calidad aki lo yega entrante november proximo. Minister Cijntje ta gradici un y tur cu a bin ta coopera y traha cabalmente riba e trayecto aki.
Medio september lo lansa e trayecto di comunicacion den cua conhuntamente ta bay informa pueblo di Corsou tocante henter e trayecto di introduccion di e combustibel nobo y di miho calidad aki ekivalente na Euro 4.
