E 13 miyon florin extra na gasto di interes den aña 2023 no tin nada di haber cu negociacion riba RAFT.Cambio di sistema di LIBOR pa SOFR ta ocasiona e extra gasto Durante e debate publico pa trata e Presupuesto Supletorio pa aña 2023, algun Parlamentario di oposicion a insisti cu e 13 miyon extra na gasto di interes, lo tin di haber cu e negociacion cu Hulanda riba refinanciamento di e debe di COVID y supervision financiero bou Ley di Reino RAFT.
E ponencia aki no ta cuadra cu realidad y pa e motibo eynan Minister Maduro a tuma su tempo pa splica Parlamento na placa chikito kico a hiba na e gasto extra aki di interes den aña 2023.
Cambio necesario di LIBOR pa SOFR
Minister Maduro a splica den Parlamento, cu na april 2023 mester a haci un cambio na cuater fiansa cu ta den e portfolio di debe di Pais Aruba y e gasto relata na esaki ta suma 13 miyon florin. E mandatario a splica cu e motibo cu mester a haci cambio ta debi cu na januari 2023 na nivel mundial a dicidi cu e benchmark LIBOR (London Interbank Offered Rate,) cu ta wordo uza pa fiha interes pa fiansa, ta stop di existi na juni 2023, y pesey tur fiansa acopla na LIBOR mester wordo cambia pa un otro sistema. Pa Aruba e cambio aki ta toca cuater fiansa cu ta data di añanan 2013, 2014, 2015 y
- Como cu nan ta fiansa haci riba e mercado internacional di capital Mericano, a scoge pa e sistema di SOFR cu ta Secured Overnight Financing Rate.' Debi cu e gasto aki a bin despues cu Presupuesto 2023 a keda aproba pa Parlamento, a haci uzo di e prome Presupuesto Supletorio di 2023 pa asina pone e 13 miyon florin disponibel pa e cambio necesario aki.
E cambio no tin nada di haber cu RAFT For di e splicacion ta bisto cu e gasto extra di interes ta debi na un cambio na nivel mundial cu no tin nada di haber si Aruba lo ta bay bou supervision financiero di Aruba LAFT of Ley di Reino RAFT. Cu LAFT of RAFT, Aruba lo mester a haci e gastonan extra aki. Hulanda mes tampoco a scapa di e extra gasto di interes pa e motibo di e cambio mundial aki. Pa e motibo aki Minister Maduro ta haya lamentabel cu Parlamentarionan di oposicion, manera Gerlien Croes, asina mes cu nan ta haya splicacion financiero detaya ta scoge pa keda cuestiona y bruha tera cu e extra gastonan di interes lo tin di haber cu negociacion riba RAFT. Na opinion di Minister Maduro, e Parlamentario por evita hopi malcomprondemento si e trata informacion di finansa publico di nos Pais na un manera mas serio.