Aruba ta un isla yena cu talento den varios disciplina. Un di e disciplinanan aki ta esun di actuacion. Actuacion ta un arte dificil cu no ta nifica simplemente posee un cara bunita dorna cu makiyahe y saca sonido.
Actuacion ta algo cu bo ta nace cu ne y sino pa medio di hopi sacrificio, disciplina y structura bo por logra domina e arte bunita aki. Aruba, tur aña ta demostra, pa medio di su pelicula- y obranan di teatro, cu nos tin individuonan cu no tin miedo di expone nan mes dilanti di publiconan critico, cu hopi biaha no ta acepta kico cu ta presenta nan dilanti, sigur ora cu nan a saca placa di nan cartera.
E fundacion Creative Art Academy ta un fundacion crea pa sostene, crea y guia persona di tur edad, pa logra nan meta di expresa nan talento pa medio di actuacion. Actualmente e fundacion aki tin grupo di talento cu regularmente y cu seriedad ta acudi na e lesnan brinda pa nan.
E logo cu C.A.A ta uza ta: “BE BRAVE ENOUGH TO MAKE MISTAKES. DON’T HIDE YOUR FACE”.
Tur cu ta desea di tuma les di actuacion of simplemente kier colabora cu e fundacion, por tuma contacto cu Paul Simon of Charles Croes na 7300001.
