No tin tereno suficiente pa sigui otorga y mester bay halto. No ta di awo, pero ya caba pa hopi aña ta conoci cu no tin suficiente tereno pa por sigi traha casnan horizontal. No tin tereno pa sigui cumpli cu e demanda cu tin pa traha casnan individual riba terenonan erfpacht y pa esunnan cu kier traha nan cas riba un tereno eigendom tambe ta birando mas dificil y sigur mas caro.
No ta keda otro cu cuminsa conscientisa comunidad cu mester construi bayendo halto. E proyecto di “Carribean Town” na Bushiri ta un bon ehempel di esaki. “Mi tabata tin e honor di cuminsa e henter e proceso di destaho publico unda a inicia den aña 2018 e maneho di otorga tereno erfpacht pa construccion di edificionan residencial pa nos propio hendenan. Esaki tabata un necesidad mirando e cantidad di peticionnan nan cu ainda tabata tin aden na DIP pendiente”, asina ex minister Otmar Oduber a duna di conoce. E tempo ey a logra haal in e atraso di peticion nan cu tabata data di añanan 1994 pa 2012, pero ya caba tabata conoci cu mester bin un cambio di cultura, unda lo mester a cuminsa construi edificionan bay halto pa asina por cumpli cu e demanda ainda atrasa foi aña 2013 pa 2020 y futuro. “Awe nos ta 4 aña mas leu y lamentablemente no ta mira nada mas pasando pa logra cumpli cu e demanda aki di tereno y vivienda pa nos hendenan.
DIP ta paralisa, den coma, y mientrastanto atrobe nos ta bay mas atrasa ainda den peticion nan cu 4 aña mas, despues di tabata riba un hopi bon caminda”. A laga foi aña 2019 un cantidad di “inbreidingsplannen” cla pa wordo ehecuta den “verkavelingsplannen” pa por a sigui cu otorgamento di terenonan, mientras a traha e tempo ey riba diferente proyectonan similar na “Carribean Town” na Bushiri, unda gobierno lo a otorga tereno erfpacht na empresanan prova pa construccion di edificionan pa vivienda cu un criterio moderno “Gated Communities” cu propio areanan recreacional, siguridad y social. Entre otro a laga un plan den un fase sumamente avansa den coordinacion cu APFA na Pos Chikito pa rond di 400 vivienda den un prome fase y 300 vivienda adicional den un di dos fase. Tambe na San Nicolas a laga un plan completamente cla di 3 edificio cu lo a crea rond di 220 vivienda, cu a inclui un grupo di architecto y ingenieronan local, cu a uni, pa presenta e plan aki na gobierno. Otro proyecto laga cla pa ehecuta ta esun na Sero Colorado unda a laga traha e tempo ey un verkavelings plan cu inbreiding pa rond 260 cas den dos diferente plan nan.
“Atrobe ta sumamente di lamenta cu DIP ta keto bay paralisa y Parlamento di Aruba ta mudo riba esaki. No mester reunionnan pa wordo informa riba ineficiencia di e departamento. Loke mester ta curashi “cohon” pa tuma decision nan y ehecuta loke tin ya caba cla riba mesa foi 4 aña pasa”, adina Otmar Oduber a laga sa. “Nos pueblo ta sclama pa e oportunidad di por tin nan propio cas y haci esaki nan hogar”. Ta gobierno su deber y obligacion den facilita esaki na e ciudadano y falta di curashi y determinacion ta perhudicando e comunidad. “Si den 3 aña di tempo na 2018 y 2019 a logra haal in un retraso di casi 20 aña, con por ta posibel cu desde 4 aña pasa, no por a “haal in” ni 1 aña mas y pio ainda no tin un interes pa continua cu e vision laga atras na 2019 pa construi edificionan vertical bayendo halto y asina den combinacion cu terenonan ainda disponibel na DIP logra “haal in” e retraso completo di esunnan wardando pa por tin nan propio vivienda”, ex minister Oduber a finalisa bisando.
