Ace Kids Club lo cuminsa cu su periodo nobo di lesnan di drama pa muchanan di 5 pa 10 aña di edad huntu cu algun drama coaches.
Ace Kids Club ta un scol di arte cu ta bou di maneho di “Art Culture Education Foundation”.
Un fundacion cu tin como meta promove Arte, Cultura y Educacion na Boneiru via di proyectonan educativo riba e tereno di musica, baile, teatro, arte plastico, arte visual y muchu mas.
Entre 2020 pa 2023 ACE Foundation a traha riba diferente proyectonan educativo entre otro e obranan teatral manera “Palo di Cuenta” y “Palo di Cuenta ta conta di Compa Nanzi”. Aparte di e diferente presentacionnan y videoclipnan cu ACE Foundation a produci nos tabatin e proyecto di “Drama Coaches” un curso intensivo pa crea drama coaches pa asina sigui promove arte y cultura aki na Boneiro. Un total di 10 drama coaches a finalisa nan curso cu exito y pronto nan lo tin nan propio produccion “Festival di obranan cortico” huntu cu ACE Foundation bou di guia di Lilimar Valencia.
Pa e motibo aki a habri inscripcion pa muchanan entre 5 pa 10 aña pa por forma parti di e “Festival di obranan cortico”. Cada coach tin e tarea di crea nan obra teatral di mas o menos 10 minuut y lo traha cu’n grupo di mucha di ACE Kids Club. Inscripcion a habri y ta cera dia 23 di september proximo.